آج کا دن
اسپیشل فیچر
یونین فلیگ کا تاریخی نفاذ
1606ء میں آج کے روز یونین فلیگ کو انگلینڈ اور اسکاٹ لینڈ کے بحری جہازوں کے پرچم کے طور پر اختیار کیا گیا۔ یہ پرچم دراصل دونوں سلطنتوں کے اتحاد کی علامت تھا، جس میں انگلینڈ کے صلیب نما نشان اور اسکاٹ لینڈ کے ترچھے صلیب نما نشان کو یکجا کیا گیا۔ اس اقدام کا مقصد دونوں ممالک کے درمیان سیاسی اور علامتی ہم آہنگی کو ظاہر کرنا تھا۔ یونین فلیگ بعد میں برطانیہ کی پہچان بن گیا اور آج بھی ایک اہم قومی علامت کے طور پر استعمال ہوتا ہے۔
برائن لاراکا عالمی ریکارڈ
12 اپریل 2004ء کو ویسٹ انڈیز کے بلے باز برائن لارا نے ٹیسٹ کرکٹ کی تاریخ میں ایک ناقابلِ فراموش کارنامہ سر انجام دیا۔لارا نے انگلینڈ کے خلاف ٹیسٹ میچ کی ایک اننگز میں 400 رنز ناٹ آؤٹ کی شاندار اننگز کھیلی۔یہ اس وقت ٹیسٹ کرکٹ کی سب سے بڑی انفرادی اننگز تھی، اور یہ ریکارڈ آج بھی برقرار ہے۔دلچسپ بات یہ ہے کہ لارا نے اس سے پہلے بھی 1994ء میں 375 رنز بنا کر انفرادی اننگز کا عالمی ریکارڈ قائم کیا تھا، جو بعد میں آسٹریلیا کے میتھیو ہیڈن نے 2003 ء میں 380 رنز بنا کر توڑا۔لیکن پھر برائن لارا نے ایک سال بعد 2004ء میں اپنا ہی ریکارڈ واپس لے لیا، اور 400 ناٹ آؤٹ کے ساتھ دنیا کو حیران کر دیا۔
''سٹریٹ چلڈرن ڈے‘‘
سڑکوں پر رہنے والے بچوں کا عالمی دن (International Day for Street Children) ہر سال 12 اپریل کو منایا جاتا ہے۔2011ء میں شروع ہونے والے اس دن کو منانے کا مقصدسڑکوں پر رہنے والے بچوں کے مسائل کو اجاگر کرنا،حکومتوں اور اداروں کو ان بچوں کے حقوق دلانے کیلئے توجہ دلانا اور دنیا بھر میں ایسے بچوں کو تعلیم، صحت، تحفظ، اور ایک بہتر زندگی کا حق دلانے کی کوشش کرناہے۔'' سٹریٹ چلڈرن ‘‘انہیں کہا جاتا ہے جوبچے اپنے خاندانوں سے کٹے ہوئے ہوتے ہیں اور سڑکوں، پارکوں یا فٹ پاتھوں پر وقت گزارتے ہیں۔
برازیل فضائی حادثہ
12اپریل 1980ء کو ٹرانس برازیل فلائٹ 303، جو ایک بوئنگ 727 طیارہ تھا، برازیل کے شہر فلوریانوپولِس کے بین الاقوامی ہوائی اڈے پر لینڈنگ کے دوران حادثے کا شکار ہو گیا۔ یہ المناک حادثہ اس وقت پیش آیا جب طیارہ خراب موسمی حالات میں رَن وے کے قریب پہنچ رہا تھا۔ حادثے کے نتیجے میں طیارہ تباہ ہو گیا اور اس میں سوار 58 افراد میں سے 55 جاں بحق ہو گئے، جبکہ صرف چند افراد معجزانہ طور پر زندہ بچ سکے۔ اس سانحے نے ہوابازی کی تاریخ میں ایک افسوسناک باب کا اضافہ کیا اور حفاظتی اقدامات کی اہمیت کو مزید اجاگر کیا۔
یورو ڈزنی ریزورٹ کا افتتاح
1992ء میں آج کے روز یورو ڈزنی ریزورٹ کا باضابطہ افتتاح کیا گیا، جس کے مرکزی تھیم پارک کو یورو ڈزنی لینڈ کا نام دیا گیا تھا۔ یہ تفریحی مقام فرانس کے شہر پیرس کے قریب قائم کیا گیا اور اسے یورپ میں ڈزنی کے تجربے کو متعارف کرانے کیلئے بنایا گیاتھا۔ افتتاح کے وقت دنیا بھر سے سیاحوں کی بڑی تعداد یہاں پہنچی اور اسے بے حد مقبولیت حاصل ہوئی۔ بعد ازاں اس ریزورٹ اور اس کے پارک کا نام تبدیل کر کے ڈزنی لینڈ ریزورٹ پیرس رکھ دیا گیا، تاکہ اس کی شناخت کو مزید واضح اور عالمی سطح پر نمایاں کیا جا سکے۔ یہ مقام آج بھی یورپ کے اہم سیاحتی مراکز میں شمار ہوتا ہے۔
