ناسا خلائی مشن وائجر 1
اسپیشل فیچر
مشتری کی دنیا بدل دینے والی تاریخی تصاویر
خلائی تحقیق کی تاریخ میں بعض مشن ایسے ہیں جو انسان کے کائنات کو دیکھنے اور سمجھنے کا انداز ہمیشہ کے لیے بدل دیتے ہیں۔ ناسا کا وائجر 1 (Voyager 1) بھی ایسا ہی ایک تاریخی مشن ہے جس نے نہ صرف نظامِ شمسی کے دور دراز سیاروں کے بارے میں حیران کن معلومات فراہم کیں بلکہ مشتری (Jupiter) کے متعلق سائنسدانوں کے کئی پرانے تصورات بھی تبدیل کر دئیے۔ 1977ء میں زمین سے روانہ ہونے والا یہ خلائی جہاز تقریباً نصف صدی گزرنے کے باوجود کائنات کے سفر پر رواں دواں ہے۔حال ہی میں معروف ویب سائٹ 'لائیو سائنس‘ نے وائجر 1 کی مشتری کے بارے میں حاصل کردہ تاریخی تصاویر اور دریافتوں کو اپنی خصوصی رپورٹ میں نمایاں کیا ہے۔ یہ تصاویر 1979ء میں حاصل کی گئی تھیں اور انہوں نے مشتری کو محض دور سے نظر آنے والے ایک بڑے سیارے کے بجائے ایک متحرک، پیچیدہ اور حیرت انگیز دنیا کے طور پر متعارف کرایا۔
وائجر 1 کا مشتری کی جانب تاریخی سفر
وائجر 1 کو ستمبر 1977ء میں خلا میں بھیجا گیا تھا۔ اس مشن کا بنیادی مقصد نظامِ شمسی کے بیرونی سیاروں کا قریب سے مشاہدہ کرنا اور ان کے ماحول، ساخت اور قدرتی خصوصیات کے بارے میں معلومات جمع کرنا تھا۔جنوری سے اپریل 1979ء کے دوران وائجر 1 نے مشتری اور اس کے بڑے چاندوں کا تفصیلی مشاہدہ کیا۔ مارچ 1979 میں یہ خلائی جہاز مشتری کے انتہائی قریب پہنچا اور سیارے سے اس کا کم ترین فاصلہ تقریباًدو لاکھ 80 ہزار کلومیٹر ریکارڈ کیا گیا۔مشتری کے قریب پہنچنے کے دوران وائجر 1 نے ہر 96 سیکنڈ بعد اس کی تصویر بنائی۔ ان تصاویر کو یکجا کرکے ایک حیرت انگیز ٹائم لیپس فلم تیار کی گئی جس میں مشتری کے بادلوں، طوفانوں اور فضائی گردش کو حرکت کرتے ہوئے دیکھا جا سکتا ہے۔ان مشاہدات نے واضح کیا کہ مشتری کا ماحول پہلے کے اندازوں سے کہیں زیادہ متحرک ہے۔ اس کے مختلف فضائی حصے مختلف رفتار اور بعض اوقات مختلف سمتوں میں حرکت کرتے ہیں۔ بادلوں کی تیز رفتار گردش اور بڑے طوفانوں نے سائنسدانوں کو یہ سمجھنے میں مدد دی کہ مشتری کا ماحول انتہائی پیچیدہ نظام کا حامل ہے۔
سرخ دھبے اور پراسرار حلقے
وائجر 1 کی سب سے اہم کامیابیوں میں مشتری کے مشہور سرخ دھبے کی تفصیلی تصاویر شامل ہیں۔ ان تصاویر سے معلوم ہوا کہ مشتری کا ماحول مسلسل تبدیلی کے عمل سے گزر رہا ہے۔ اس کے بادلوں کی تہیں، تیز ہوائیں اور وسیع طوفانی نظام ایک دوسرے سے پیچیدہ انداز میں جڑے ہوئے ہیں۔اس مشن کی ایک اور غیر معمولی دریافت مشتری کے گرد موجود باریک اور مدھم حلقے تھے۔ اس سے پہلے سائنسدانوں کو مشتری کے حلقوں کا علم نہیں تھا۔ وائجر 1 نے سورج کی روشنی کے پس منظر میں ان حلقوں کی تصاویر حاصل کیں جس سے ان کی موجودگی کا انکشاف ہوا۔یہ حلقے بنیادی طور پر گردوغبار کے باریک ذرات پر مشتمل ہیں۔ بعد میں زمینی دوربینوں نے بھی ان کی موجودگی کی تصدیق کی جبکہ جولائی 1979ء میں مشتری کے قریب پہنچنے والے وائجر 2 نے ان حلقوں کی مزید واضح تصاویر حاصل کیں۔آج سائنسدان جانتے ہیں کہ نظامِ شمسی کے چار بڑے بیرونی سیاروں یعنی مشتری، زحل، یورینس اور نیپچون، سب کے گرد حلقے موجود ہیں۔
ایک حیران کن انکشاف
وائجر 1 کی دریافتوں میں سب سے حیرت انگیز مشاہدات میں سے ایک مشتری کے چاند IOپر فعال آتش فشاں کی موجودگی تھی۔1979ء میں جب خلائی جہاز نے آئی او کا قریب سے مشاہدہ کیا تو اسے وہاں ایک آتش فشاں پھٹتا ہوا نظر آیا۔ یہ تاریخ میں زمین کے علاوہ کسی دوسرے فلکیاتی باڈی پر آتش فشانی سرگرمی کا پہلا براہِ راست مشاہدہ تھا۔اس دریافت نے سائنس کی دنیا میں ایک نیا باب کھولا۔ اس سے پہلے عام طور پر یہ خیال کیا جاتا تھا کہ آتش فشانی سرگرمیاں بنیادی طور پر زمین جیسے سیاروں تک محدود ہیں ۔آئی او پر موجود لوکی پیٹیرا (Loki Patera) نامی آتش فشاں کا اندازاً قطر 200 کلومیٹر ہے اور اسے اس چاند کے سب سے بڑے آتش فشانی علاقوں میں شمار کیا جاتا ہے۔
نصف صدی بعد بھی سفر جاری
وائجر 1 کی اہمیت صرف مشتری تک محدود نہیں رہی، اس خلائی جہاز نے بعد کے برسوں میں نظامِ شمسی کے دیگر حصوں کے بارے میں بھی قیمتی معلومات فراہم کیں۔ 1990ء میں اس نے زمین کی تاریخی تصویر پیل بلیو ڈاٹ (Pale Blue Dot) بھی حاصل کی تھی، جس میں ہمارا سیارہ خلا کی وسعت میں روشنی کے ایک انتہائی چھوٹے نقطے کی صورت میں دکھائی دیتا ہے۔اس تصویر کے فوراً بعد سائنسدانوں نے وائجر 1 کا کیمرہ بند کر دیا تاکہ باقی توانائی کو دیگر سائنسی آلات کے لیے محفوظ رکھا جا سکے۔2012ء میں وائجر 1 نے ہیلیوسفیئر (Heliosphere) کی حدود عبور کرکے بین النجمی خلا (Interstellar Space) میں داخل ہونے کا اہم سنگ میل عبور کیا۔ اس وقت یہ خلا میں مقناطیسی میدان، پلازما اور کائناتی شعاعوں سے متعلق معلومات جمع کر رہا ہے۔ اس کے دس سائنسی آلات میں سے اب صرف دو فعال ہیں۔ناسا کے مطابق اس خلائی جہاز کو توانائی فراہم کرنے والے جوہری نظام کی طاقت وقت کے ساتھ کم ہو رہی ہے۔ سائنسدانوں کو توقع ہے کہ 2030ء کی دہائی میں اس کی توانائی مکمل طور پر ختم ہو سکتی ہے تاہم اس کے باوجود یہ انسان کی بنائی ہوئی ان چند غیر معمولی مشینوں میں شامل رہے گا جنہوں نے زمین سے اربوں کلومیٹر دور تک سفر کیا۔رپورٹ کے مطابق 18 نومبر 2026ء کو وائجر 1 زمین سے تقریباً 25.89 ارب کلومیٹر دور پہنچ کر ایک نیا سنگ میل عبور کرنے والا ہے۔ اس فاصلے کو طے کرنے میں روشنی کو بھی تقریباً 24 گھنٹے درکار ہوں گے۔ اسے ایک لائٹ ڈے کہا جاتا ہے۔