تھوک سے بال چمکانے پر پابندی ختم،پاکستانی بولرز خوش
لاہور(سپورٹس ڈیسک )پاکستان کرکٹ ٹیم کے فاسٹ بولرز نے بال چمکانے کے لیے تھوک پر پابندی ختم ہونے کو خوش آئند قرار دے دیا۔
آئی سی سی کی جانب سے کووڈ 19 کے دوران بال چمکانے کے لیے تھوک پر پابندی لگائی تھی جس کے بعد گزشتہ 5 برس سے فاسٹ بولرز بال تھوک کی بجائے پسینے سے چمکاتے ہیں تاہم اب بھارتی بورڈ نے آئی پی ایل کیلئے بال پر تھوک لگانے کی پابندی ختم کردی ہے ۔قومی ٹیم کے فاسٹ بولر نسیم شاہ نے کہا کہ‘پابندی کی وجہ سے بال کو سب بولرز پسینے سے چمکاتے ہیں لیکن تھوک سے بال جلدی چمکتا ہے ، اگر تھوک لگانے کی اجازت ملتی ہے تو ایک طرف سے اچھے طریقے سے بال چمکے گا لیکن اس کے باوجود بولنگ اچھی کرنا ہوگی کیونکہ صرف بال چمکنے سے بہترین بولنگ نہیں ہو گی، اس پابندی کے ختم ہونے سے زیادہ فرق تو نہیں ہوگا لیکن ریورس کے لیے ایک طرف سے گیند زیادہ پرانا نہیں ہوگا’۔ محمد وسیم جونیئر نے کہاکہ بال پر تھوک کا استعمال ہمارے لیے مددگار ثابت ہو گا’۔آل راؤنڈر فہیم اشرف نے کہا کہ پسینے کی نسبت تھوک سے جلد اور زیادہ بال چمکتا ہے ، کہا جا رہا ہے کہ پہلے جیسی بولنگ نہیں ہورہی اب تھوک کی اجازت ملتی ہے تو پہلے جیسی بولنگ ہوگی جیسے پہلے کرکٹ ہو رہی تھی ویسے ہونا شروع ہو جائے گی،اس کے علاوہ نوجوان فاسٹ بولر عاکف جاوید نے کہا بال کے دونوں طرف پسینے لگانے سے ریورس ہونا کم ہوگیا تھا، اب اگر اجازت مل گئی تو بولرز کو مدد ملے گی اور ریورس سوئنگ ہو گی۔
