سٹاک مارکیٹ میں زبردست تیزی، انڈیکس ملکی تاریخ کی بلند ترین سطح پر بند
کراچی: (دنیا نیوز) پاکستان سٹاک ایکسچینج میں آج 2 نئے ریکارڈز قائم ہوئے، ہنڈرڈ انڈیکس تاریخ کی بلند ترین سطح پر ٹریڈ اور بند بھی ہوا۔
کاروباری ہفتے کے چوتھے روز کاروبار کے آغاز پر ہی سٹاک مارکیٹ میں زبردست تیزی دیکھنے میں آئی۔
ٹریڈنگ کے دوران پاکستان سٹاک ایکسچینج میں 1400 سے زائد پوائنٹس کا اضافہ ہوا جس کے ساتھ تاریخ میں پہلی بار سٹاک مارکیٹ میں ہنڈرڈ انڈیکس ایک لاکھ 19 ہزار 421 پوائنٹس کی حد کو چھو گیا جبکہ کم سے کم انڈیکس کی سطح ایک لاکھ 18 ہزار 444 رہی۔
تاہم کاروباری دن کے اختتام پر پاکستان سٹاک ایکسچینج میں ہنڈرڈ انڈیکس 795 پوائنٹس کے اضافے کے ساتھ ایک لاکھ 18 ہزار 769 پوائنٹس کی سطح پر بند ہوا۔
آج سٹاک مارکیٹ میں 442 کمپنیز میں سے 205 کمپنیز کے شیئرز میں اضافہ اور 176 کمپنیز کے شیئرز میں کمی ہوئی، جبکہ 66 کروڑ 78 لاکھ مالیت شیئرز کا کاروباری حجم 38 ارب روپے سے زائد رہا۔
واضح رہے کہ گزشتہ کاروباری دن کے اختتام پر سٹاک مارکیٹ میں انڈیکس 972 پوائنٹس کے اضافے کیساتھ 1 لاکھ 17 ہزار 974 پوائنٹس کی سطح پر بند ہوا تھا۔
دوسری جانب انٹر بینک میں امریکی کرنسی کی قدر میں 11 پیسے کمی واقع ہوئی ہے جس کے ساتھ انٹر بینک میں ڈالر 280.21 روپے سے کم ہو کر 280.10 روپے پر آگیا ہے۔
