کراچی: رینجرزاور پولیس کی کارروائی، ڈکیت گروہ کے انتہائی مطلوب3 ملزمان گرفتار
کراچی : (دنیانیوز) سندھ رینجرز اور پولیس نے سہراب گوٹھ جنت گل ٹاؤن میں مشترکہ کارروائی کرتے ہوئے افغانی ڈکیت گروہ کے انتہائی مطلوب3 ملزمان گرفتار کرلیے۔
ترجمان سندھ رینجرز کے مطابق گرفتار ملزمان میں جان آغا، امید گل عرف لغمانی اور عبدالرحمان شامل ہیں ، گرفتار ملزمان کے قبضے سے ڈکیتیوں میں استعمال ہونے والا غیر قانونی اسلحہ برآمد کرلیا گیا ۔
ترجمان نے بتایا کہ گرفتار ملزمان شہر کے مختلف علاقوں میں 300 سے زائد سٹریٹ کرائم میں ملوث ہیں ، گرفتار ملزمان نے دوران واردات 3 سے زائد شہریوں کو فائرنگ کرکے زخمی کرنے کا بھی اعتراف کیا ، گرفتار ملزم جان آغا نے ڈکیتیوں کے لیے کئی بار درہ آدم خیل سے بذریعہ فیس بک اسلحہ منگوانے کا انکشاف کیا۔
ترجمان رینجرز کے مطابق گرفتار ملزم جان آغاایک منظم گروہ کے سرغنہ کے طور پر اپنے گروپ کو آپریٹ کرتا تھا، گرفتار ملزم کئی بار گرفتاری کے ڈر سے ایران میں روپوش ہوجاتا تھا اور کچھ عرصے بعد کراچی واپس آکر دوبارہ جرائم میں ملوث ہو جاتا تھا۔
ترجمان کاکہنا ہے کہ گرفتار ملزم جان آغا اور اس کے ڈکیت ساتھی اس سے پہلے بھی ڈکیتی کی متعدد وارداتوں کی پاداش میں گرفتار ہو کر جیل جاچکے ہیں۔
