شارع فیصل پر دو چلتی گاڑیوں میں ایک دوسرے پر فائرنگ، 2 سکیورٹی گارڈ زخمی
کراچی: (دنیا نیوز) شارع فیصل پر چلتی گاڑیوں سے فلمی انداز میں فائرنگ کا واقعہ، دو گاڑیوں میں سوار افراد نے ایک دوسرے پر فائرنگ کی جس کے نتیجے میں 2 سکیورٹی گارڈ زخمی ہوگئے۔
پولیس کے مطابق فائرنگ کا واقعہ گزشتہ رات تین بجے لڑکی کے تنازع پر پیش آیا، ایک لڑکی گاڑی میں اپنے دوست کے ساتھ شارع فیصل پر جا رہی تھی، لڑکی کا بوائے فرینڈ گاڑی کا پیچھا کرتا ہوا آیا اور پھر فائرنگ کا تبادلہ ہوا۔
بااثر نوجوان نے گاڑی پر فائرنگ کر کے گاڑی روکنے کا کہا، لگژری گاڑی میں سوار سکیورٹی گارڈز نے دوسری گاڑی پر فائرنگ کی، دوسری گاڑی پر موجود سکیورٹی گارڈز بھی فائرنگ کرتے رہے۔
پولیس کے مطابق واقعہ کے بعد لڑکی کار سے اتر کر فرار ہو گئی تھی جسے حراست میں لے لیا گیا ہے، گاڑیوں میں سوار دونوں دوستوں کو بھی حراست میں لے لیا گیا، فائرنگ سے زخمی دونوں سکیورٹی گارڈز بھی پولیس کی حراست میں ہیں۔
گاڑیوں میں سوار سکیورٹی گارڈ کے چار ہتھیار پولیس نے قبضے میں لے لیے، واقعے کا مقدمہ اب تک درج نہیں ہوا، ایئر پورٹ پولیس نے دعویٰ کیا ہے کہ پولیس کی مدعیت میں مقدمہ درج کیا جائے گا۔
