اداکارہ ریشم نے تنقید کرنے والوں کو آڑے ہاتھوں لے لیا
کراچی: (ویب ڈیسک) پاکستانی شوبز انڈسٹری کی معروف اداکارہ ریشم نے اپنے اوپر تنقید کرنے والوں کو کرارا جواب دیتے ہوئے طاقت کسی مثبت چیز پر خرچ کرنے کا مشورہ دے دیا۔
حال ہی میں اداکارہ ریشم سرکاری ٹی وی چینل کی رمضان ٹرانسمیشن میں شریک ہوئیں جہاں انہوں نے کہا کہ اکثر لوگ ڈپریشن کا شکار ہونے کا شکوہ کرتے ہیں مگر میں ڈپریشن میں یقین نہیں رکھتی، میرے خیال میں ڈپریشن صرف اللہ سے دوری کا نتیجہ ہے۔
اداکارہ کے اس بیان پر انہیں سوشل میڈیا صارفین کی جانب سے خوب تنقید کا نشانہ بنایا گیا جس پر انہوں نے کہا کہ ہر انسان کی اپنی سوچ ہوتی ہے اور میرے نزدیک ہر مسئلے کا حل صرف اللہ سے محبت اور لگاؤ ہے پھر چاہے وہ ڈپریشن ہو یا کوئی اور مسئلہ۔
اداکارہ ریشم کا اپنے پیغام میں مزید کہنا تھا کہ شاید کچھ لوگوں کو میری بات سمجھ نہیں آئی، گہری باتیں ہر ایک کو سمجھ آتی بھی نہیں ہیں، تنقید کرنے والوں کو میں یہ کہنا چاہتی ہوں کہ اپنی انرجی کسی مثبت چیز کیلئے سنبھال کر رکھیں۔
