سوشل میڈیا صارفین نے شہناز گل کو غیر مہذب قرار دے دیا
ممبئی: (ویب ڈیسک) بھارتی اداکارہ، ماڈل اور گلوکارہ شہناز گل کو ان کے سوشل میڈیا صارفین نے غیرمہذب اور بدتمیز قرار دے دیا۔
یاد رہے کہ شہناز حال ہی میں اداکار نواز الدین صدیقی اور نیہا شرما کی فلم ’جوگیرا سارا را را‘ کی سکریننگ کے حوالے سے منعقدہ تقریب میں نظر آئیں، جہاں وہ روایتی لباس (آف وائٹ کرتا اور گلابی دوپٹہ) پہنے ہوئی تھیں۔
بہت زیادہ شہرت کی حامل شہناز کو سکریننگ کی تقریب میں دیکھتے ہی پرستار ان کے گرد جمع ہو گئے، اس دوران جب وہ اپنی کار کی جانب جانے لگیں تو پرستاروں نے سلیفی بنانا شروع کردی۔
اس دوران دیگر پرستاروں نے ان سے سیلفی بنوانے کی درخواست کی تاہم انہوں نے اس کے بجائے یہ کیا کہ ایک پرستار کا موبائل فون لے کر ایک سیلفی بنائی اور وہاں سے روانہ ہو گئیں۔
جب انٹر نیٹ صارفین نے اس منظر کو ایک ویڈیو میں دیکھا تو انہوں نے شہناز کے اس اقدام پر کڑی تنقید کرتے ہوئے انہیں غیرمہذب قرار دیا، بعض صارفین کا کہنا تھا کہ شہرت ہر ایک کو راس نہیں آتی۔
