گووندا طبیعت بہتر ہونے پر ہسپتال سے ڈسچارج، مسکراتے ہوئے باہر آئے
ممبئی: (ویب ڈیسک) معروف بالی ووڈ اداکار گووندا کو اچانک طبیعت بگڑنے پر ہسپتال منتقل کیا گیا تھا، تاہم اب وہ صحت یاب ہو کر گھر واپس پہنچ گئے ہیں، ہسپتال سے ڈسچارج ہوتے وقت وہ نہایت خوش نظر آئے۔
گووندا کو 12 نومبر کی صبح بیہوشی کی حالت میں ممبئی کے نجی ہسپتال داخل کرایا گیا تھا، جہاں انہیں ابتدائی طبی امداد دینے کے بعد ان کے ٹیسٹس کئے گئے تھے۔
خاندانی ذرائع کے مطابق اداکار کی طبیعت 11 نومبر کو اس وقت خراب ہوئی جب وہ ہسپتال میں زیر علاج لیجنڈری اداکار دھرمیندر سے ملاقات کیلئے ہسپتال گئے تھے لیکن 12 نومبر کو ان کی حالت مزید خراب ہوئی اور گھر میں ہی گر گئے۔
اداکار کو ہنگامی بنیادوں ہر ہسپتال لایا گیا تھا، جہاں انہیں ابتدائی طبی امداد دینے کے بعد ان کے ٹیسٹس بھی کئے گئے اور انہیں پورا دن نگرانی میں رکھا گیا، بعد ازاں گووندا کو ادویات اور کچھ احتیاطی تدابیر کے ساتھ ڈسچارج کیا گیا اور انہوں نے ہسپتال سے نکلتے وقت میڈیا سے بھی گفتگو کی۔
گووندا نے میڈیا سے بات کرتے ہوئے بتایا کہ زیادہ کام کرنے، تھکاوٹ ہونے اور ورزش نہ کرنے کی وجہ سے ان کی حالت خراب ہوئی لیکن خطرے کی کوئی بات نہیں، انہیں جتنی ادویات کی ضرورت تھی، ڈاکٹرز نے انہیں اتنی ہی ادویات دی ہیں اور اب اپنی صحت کا خاص خیال رکھیں گے۔
انہوں نے مداحوں کو بھی مشورہ دیا کہ وہ اپنی صحت کا خیال رکھیں، یوگا اور ورزش کیا کریں، بہت زیادہ کام نہ کریں اور دباؤ نہ لیں۔
