ہاکی کی عظمت رفتہ کی بحالی کیلئے پورا تعاون کریں گے: محسن نقوی
لاہور: (دنیا نیوز) چیئرمین پاکستان کرکٹ بورڈ سید محسن نقوی نے کہا ہے کہ ہاکی کی عظمت رفتہ کی بحالی کیلئے پورا تعاون کریں گے۔
چیئرمین پاکستان کرکٹ بورڈ محسن نقوی سے ہاکی کے سابق اولپمئنز شہباز سینئر اور خواجہ جنید نے ملاقات کی، سابق ہاکی پلیئرز نے محسن نقوی کو جرمن اور نیدرلینڈ کے ہاکی کلبز کے دورے کی تفصیلات سے آگاہ کیا اور مارچ میں جرمن نیشنل جونیئر ہاکی ٹیم کے دورہ پاکستان بارے بریف کیا۔
شہباز سینئر اور خواجہ جنید نے چیمپئنز ٹرافی پر چیئرمین پی سی بی محسن نقوی کے اصولی مؤقف کو سراہا اور کہا کہ کرکٹ سٹرکچر تیزی سے آپ نے درست کیا ہے، اسی رفتار سے ہاکی کے سسٹم کو ٹھیک کرنے کی ضرورت ہے۔
ملاقات میں ہاکی کے کھیل کے فروغ کے لئے پائیدار بنیادوں پر اقدامات پر بھی تبادلہ خیال کیا گیا، محسن نقوی نے سابق ہاکی پلیئرز کو ہاکی کے کھیل کے لئے اپنے ہر ممکن تعاون کی یقین دہانی کرائی۔
چیئرمین پی سی بی محسن نقوی کا کہنا تھا کہ ہاکی پاکستان کا قومی کھیل ہے اور پاکستانی ہاکی ٹیم کا ماضی درخشاں تاریخ سے عبارت ہے، ہاکی کی عظمت رفتہ کی بحالی کے لئے پورا تعاون کریں گے۔
