ٹک ٹاک نے مزید پیرنٹنگ کنٹرول فیچرز پیش کر دیئے
کیلیفورنیا: (ویب ڈیسک) ٹک ٹاک نے کم عمر افراد کو ایپلی کیشن سے دور یا محدود رکھنے کیلئے مزید پیرنٹنگ کنٹرول فیچرز پیش کر دیئے۔
شارٹ ویڈیو شیئرنگ ایپلی کیشن ٹک ٹاک کی جانب سے جاری بیان کے مطابق کمپنی نے پیرنٹنگ کنٹرول فیچرز میں اضافہ کرتے ہوئے والدین کو یہ رسائی دی ہے کہ وہ اپنے بچوں کا وقت ٹک ٹاک پر محدود کر دیں۔
مذکورہ فیچر کے تحت والدین چاہیں تو اپنے بچوں کے اکاؤنٹس پر ہفتہ وار استعمال کرنے کا وقت 30 منٹ تک محدود کر دیں، اسی طرح والدین کو چھٹی والے دن ٹک ٹاک کو چلانے کے لئے وقت میں اضافے کرنے تک بھی رسائی دی گئی ہے۔
فیچر کے تحت بچے از خود ٹک ٹاک پر اپنے دورانیے کو نہیں بڑھا سکیں گے، ان کی ایپ والدین کی جانب سے مقرر کئے گئے وقت کے بعد کام نہیں کرے گی اور اگر بچے ٹائم بڑھانے کی کوشش کریں گے تو ان سے ایپ خصوصی پاس ورڈ پوچھے گا جو کہ صرف والدین کو معلوم ہوگا۔
پیرنٹنگ کنٹرول کے تحت والدین کو یہ رسائی بھی دی گئی ہے کہ وہ اس پر بھی نظر رکھ سکیں گے کہ ان کے بچوں کو کون فالو کر رہا ہے اور ان کے بچے کن کو فالو کر رہے ہیں اور کن سے ان کی گفتگو ہوتی ہے؟ فیچر کے تحت بچے نوٹیفکیشنز کو ڈیلیٹ نہیں کر سکیں گے۔
ٹک ٹاک کے مطابق اگر والدین اپنے کم عمر بچوں کیلئے ڈیوائس ٹائم محدود نہ بھی کریں تو بھی 18 سال سے کم عمر افراد کیلئے کمپنی از خود وقت کم کر کے 60 منٹ تک محدود کر دے گی۔
یعنی 18 سال سے کم عمر بچے 60 منٹ سے زائد وقت تک ٹک ٹاک کو استعمال نہیں کر سکیں گے، ان کی ایپ مقررہ وقت کے بعد کام نہیں کرے گی۔
