امام حسین علیہ السلام اور شہدائے کربلا کا چہلم عقیدت و احترام سے منایا گیا
لاہور: (دنیا نیوز) لاہور سمیت ملک بھر میں حضرت محمد ﷺ کے نواسے حضرت امام حسین علیہ السلام اور شہدائے کربلا کو خراج عقیدت پیش کرنے کے لیے ان کا چہلم روایتی عقیدت و احترام کے ساتھ منایاگیا۔
ملک بھر سے علم اور ذوالجناح کے جلوس برآمد ہوئے جن میں نوحہ خوانی اور ماتم برپا کر کے شہداء کو خراج عقیدت پیش کیا گیا۔
لاہور
لاہور میں چہلم حضرت امام حسین علیہ السلام اور صوفی بزرگ حضرت داتا علی ہجویری ؒ کے عرس کے آخری روز کے باعث سکیورٹی کے سخت انتظامات کیے گئے ، عزاداری جلوسوں، مجالس اور عرس کی تقریبات کے لئے پنجاب پولیس ہائی الرٹ رہی۔
آئی جی پنجاب ڈاکٹر عثمان انور نے کہا کہ پولیس اہلکاروں نے چہلم حضرت امام حسین علیہ السلام کے مقدس پروگراموں کا پرامن اور محفوظ انعقاد یقینی بنایا، تمام مکاتب فکر سے تعلق رکھنے والے افراد مذہبی ہم آہنگی، بین المسالک اتحاد اور رواداری کو فروغ دیا۔
انہوں نے کہا کہ مجالس، عزاداری جلوسوں، عرس تقریبات کو بھرپور سکیورٹی انتظامات فراہم کی گئی، چہلم حضرت امام حسین علیہ السلام کے موقع پر 644 مجالس منعقد، 392 عزاداری جلوس برآمد ہوئے جن کیلئے 37 ہزار سے زائد پولیس افسران اور اہلکار سکیورٹی پر تعینات تھے۔
کراچی
ادھر کراچی میں چہلم امام حسین علیہ السلام کا مرکزی جلوس دن ایک بجے نشتر پارک سے برآمد ہوا، جلوس کی سکیورٹی کے لئے ایم اے جناح روڈ اور اطراف کی گلیوں کو کنٹینرز لگا کر بند کیا گیا تھا، جلوس کے راستے میں آنے والی مارکیٹوں کی دکانوں کو بم ڈسپوزل یونٹ نے سرچنگ کے بعد سیل کردیا گیا تھا۔
کراچی کے مختلف علاقوں میں موبائل فون سروس بند کردی گئی اور موٹرسائیکل کی ڈبل سواری پر بھی پابندی عائد ہے۔
جلوس کی سکیورٹی کے لئے 4 ہزار سے زائد پولیس اہکار تعینات کیے گئے تھے جبکہ شہر میں دفعہ 144 بھی نافذ رہی اور امن وامان کی صورتحال کے پیش نظر سندھ بھر میں ریڈ الرٹ جاری کیا گیا تھا۔
پشاور
پشاور میں چہلم امام حسین علیہ السلام کے سلسلے میں سہ پہر 3 بجے دو مرکزی جلوس برآمد ہوئے، جلوس ذوالجناح امام بارگاہ آخوندآباد محلہ نوبجوڑی کوہاٹی سے جبکہ دوسرا جلوس کوچہ رسالدار قصہ خوانی سے برآمد ہوا۔
دونوں جلوس اپنے مقررہ راستوں سے ہوتے ہوئے واپس اسی امام بارگاہ پر اختتام پذیر ہو گئے، جلوسوں کی سکیورٹی کیلئے سخت انتظامات کیے گئے تھے۔
کوئٹہ
اسی طرح بلوچستان کے دارالحکومت کوئٹہ میں چہلم کا مرکزی جلوس مومن آباد امام بارگاہ علمدار روڈ سے برآمد ہوا جس میں 22 دستے شامل تھے۔
جلوس کی حفاظت کے لیے پولیس، بی سی اور ایف سی کی 5 ہزار نفری تعینات تھی، جلوس کے روٹ کی سی سی ٹی وی کیمروں سے نگرانی کی جاتی رہی، جلوس روایتی راستوں سے ہوتا ہوا بہشت زینب ہزارہ قبرستان پہنچ کر اختتام پذیر ہوا۔
دوسرا جلوس ولی العصر امام بارگاہ ہزارہ ٹاؤن سے برآمد اور روایتی راستوں سے ہوتا ہوا ہزارہ قبرستان مغربی بائی پاس پر پہنچ کر ختم ہوا۔
