حقیقی مرد کبھی عورت پر حملہ نہیں کرتے: فضا علی کی یاسر نواز پر تنقید
لاہور: (ویب ڈیسک) پاکستانی شوبز انڈسٹری میں جاری تنازع اس وقت مزید شدت اختیار کر گیا جب اداکار یاسر نواز نے اپنی اہلیہ ندا یاسر کے حق میں بیان دیا۔
ندا یاسر حال ہی میں فوڈ ڈیلیوری رائیڈرز سے متعلق اپنے ایک بیان کی وجہ سے خبروں کی زینت بنیں جسے عوامی سطح پر نامناسب قرار دیا گیا، شدید عوامی ردِعمل کے بعد ندا یاسر نے اپنے بیان پر معذرت بھی کر لی تھی تاہم شوبز انڈسٹری کی بعض شخصیات نے ان کے مؤقف سے اختلاف کیا جن میں فضا علی بھی شامل تھیں۔
فضا علی کا کہنا تھا کہ فوڈ ڈیلیوری رائیڈرز انتہائی محنتی لوگ ہوتے ہیں اور اگر انہیں تھوڑی سی ٹِپ دے دی جائے تو اس میں کوئی برائی نہیں، رائیڈرز پر پیسے ہڑپ کرنے جیسے الزامات عائد کرنا درست نہیں ہے۔
اس تنقید کے بعد یاسر نواز میدان میں آئے اور کہا کہ وہ بلا وجہ ان کی اہلیہ کو نشانہ بنا رہی ہیں تاہم اب فضا علی نے یاسر نواز کے بیان کا جواب دیتے ہوئے کہا ہے کہ ایک حقیقی مرد کبھی کسی عورت پر حملہ نہیں کرتا۔
فضا علی کے اس بیان کے بعد سوشل میڈیا پر ایک بار پھر بحث چھڑ گئی، جہاں صارفین مختلف آراء کا اظہار کر رہے ہیں اور شوبز انڈسٹری میں جاری اس تنازع پر تبصرے جاری ہیں۔
