کوانٹم ٹیکنالوجی مستقبل کی عالمی مسابقت کا فیصلہ کرے گی، احسن اقبال
اسلام آباد: (دنیا نیوز) وفاقی وزیر منصوبہ بندی احسن اقبال نے کہا ہے کہ پاکستان خلائی اور جدید ٹیکنالوجی کے شعبوں میں ترقی کے لیے سنجیدہ اقدامات کر رہا ہے اور کوانٹم ٹیکنالوجی مستقبل میں عالمی مسابقت کا فیصلہ کن عنصر ثابت ہوگی۔
اے آئی رائیز ایکسپو 2025 سے خطاب کرتے ہوئے احسن اقبال نے کہا کہ اڑان پاکستان کے ستون ای پاکستان کے تحت ملک کو ڈیجیٹائز کیا جا رہا ہے، کوانٹم کمپیوٹنگ، نینو ٹیکنالوجی اور نیو مینوفیکچرنگ کے لیے تین نئے نیشنل سینٹرز قائم کیے جا رہے ہیں۔
وفاقی وزیر کا کہنا تھا کہ کوانٹم ویلی پاکستان کو ڈیپ ٹیک معیشت کا مرکز بنایا جائے گا جبکہ حکومت کا ہدف پاکستان کو ٹیکنالوجی سے لیس اور عالمی سطح پر مسابقتی قوم بنانا ہے، مصنوعی ذہانت پاکستان کی معاشی طاقت کا نیا انجن بن رہی ہے اور وہی قومیں عالمی معیشت کی قیادت کریں گی جو ٹیکنالوجی میں سبقت حاصل کریں گی۔
احسن اقبال نے مزید کہا کہ حکومت نے اڑان پاکستان وژن کے تحت ای پاکستان حکمت عملی تشکیل دی ہے جس میں برآمدات، ڈیجیٹل معیشت اور جدت کو بنیادی ستون قرار دیا گیا ہے، پاکستان میں صنعتوں کو جدید بنانے کے لیے روبوٹکس ناگزیر ہے۔
وفاقی وزیر کے مطابق حکومت یونیورسٹی ریسرچ کو صنعت اور برآمدات سے جوڑنے پر بھی کام کر رہی ہے جبکہ سیٹلائٹ ٹیکنالوجی کے ذریعے خوراک، تجارت اور مواصلات کے شعبوں کو مضبوط بنایا جا رہا ہے۔
