بلوچستان پولیس کے شہدا پیکیج کے تحت ملنے والی مالی معاونت میں اضافہ
کوئٹہ: (دنیا نیوز) بلوچستان پولیس کے شہدا پیکیج کے تحت ملنے والی مالی معاونت میں اضافہ کر دیا گیا۔
انسپکٹر جنرل آف پولیس بلوچستان محمد طاہر نے مالی معاونت میں اضافے کا اعلان کیا، شہدا کے خاندانوں کی مالی معاونت کے لئے دی جانے والی رقم 1 لاکھ سے بڑھا کر 2 لاکھ روپے مقرر کی گئی ہے۔
آئی جی پولیس بلوچستان نے کہا کہ دوران ڈیوٹی شدید زخمی اہلکاروں کو 10 ہزار سے بڑھا کر 1 لاکھ روپے دیئے جائیں گے، معمولی زخمی ہونے والے پولیس اہلکار کو 5 ہزار کی بجائے 25 ہزار روپے دیئے جائیں گے۔
محمد طاہر نے کہا کہ شہدا کی تدفین کے لئے مالی معاونت کو 40 ہزار سے بڑھا کر 75 ہزار روپے کر دیا گیا، صوبے سے باہر میت لے جانے پر 50 ہزار کی بجائے اب 1 لاکھ روپے دیئے جائیں گے۔
پولیس ملازمین کی شادی کیلئے مالی معاونت کو 12 ہزار 500 سے بڑھا کر 50 ہزار روپے مقرر کر دی، شہدا اور فوت ہونے والے اہلکاروں کی بیٹیوں کی شادی کی امدادی رقم کو 50 ہزار سے بڑھا کر 2 لاکھ روپے مقرر کیا گیا ہے۔
آئی جی پولیس نے کہا کہ گریڈ 1 تا 11 فوت ہونے والے ملازمین کی بیواﺅں کی مالی معاونت 12 ہزار روپے کر دی گئی ہے، گریڈ 12 تا 15 فوت ہونے والے ملازمین کی بیواﺅں کی مالی معاونت 14 ہزار روپے کر دی گئی۔
انہوں نے کہا کہ گریڈ 16 تا 17 تک فوت ہونے والے ملازمین کی بیواﺅں کی مالی معاونت 16 ہزار، گریڈ 18 تک فوت ہونے والے ملازمین کی بیواﺅں کی مالی معاونت 20 ہزار روپے کر دی گئی ہے۔
محمد طاہر نے کہا کہ شہدا، ریٹائرڈ ملازمین اور ان کے بچوں کا ہم پر حق ہے، شہدا نے جو قربانی دی ہے وہ ہمارے لئے مشعل راہ ہے، شہدا ہمارے ماتھے کا جھومر ہیں۔
