وزارت اطلاعات و نشریات نے معرکۂ حق بارے خصوصی نغمہ جاری کر دیا
اسلام آباد: (دنیا نیوز) وزارت اطلاعات و نشریات نے معرکۂ حق کی تاریخی کامیابی کا ایک سال مکمل ہونے پر قومی جذبے سے بھرپور خصوصی نغمہ جاری کر دیا۔
معروف گلوکار شیراز اپل کی آواز میں اس نغمے کے بول ’’ بُنْيَانٌ مَّرْصُوْص ۔ ہمیشہ تیار ہیں ہم‘‘ ہیں، ملی نغمے میں 10 مئی کو پاکستان مونومنٹ میں منعقدہ معرکۂ حق کی مرکزی تقریب کے دلکش مناظر شامل کئے گئے ہیں۔
نغمے میں صدر مملکت آصف علی زرداری، وزیراعظم پاکستان محمد شہباز شریف اور فیلڈ مارشل سید عاصم منیر سمیت اعلیٰ سول و عسکری حکام، کابینہ کے ارکان اور اہم سیاسی و سماجی شخصیات کی شرکت کے مناظر بھی شامل ہیں۔
تینوں مسلح افواج کے چاک و چوبند دستوں کی پریڈ کے مناظر کو بھی نغمے میں نمایاں انداز میں عکس بند کیا گیا ہے۔
خصوصی نغمے میں قومی یکجہتی، دفاع وطن کے عزم اور مسلح افواج کی پیشہ ورانہ صلاحیتوں کو اجاگر کیا گیا ہے
نغمے کی عکس بندی میں معرکہ حق کی مرکزی تقریب میں شریک عوام کے والہانہ جذبات کی جھلکیاں بھی شامل ہیں۔
نغمے میں معرکۂ حق کی کامیابی کو قومی تاریخ کا اہم باب قرار دیتے ہوئے اس عزم کا اعادہ کیا گیا ہے کہ پاکستان کی مسلح افواج اور پوری قوم وطن عزیز کے دفاع کیلئے ہمیشہ تیار ہیں۔
