گوگل میپس میں اہم مقامات نمایاں کرنے کیلئے بڑی تبدیلی
کیلی فورنیا:(ویب ڈیسک) گوگل نے خاموشی سے میپس میں ہوٹلوں، ساحلوں اور دیگر اہم مقامات کو ہائی لائٹ کرنے کے لیے استعمال ہونے والی پنز (pins) کو ری ڈیزائن کیا رہا ہے۔
بظاہر تو یہ تبدیلی معمولی ہے مگر اس سے گوگل میپس کا ڈیزائن کافی حد تک تبدیل محسوس ہونے لگا ہے، اس سے قبل گوگل میپس میں ایک لمبی اور تنگ سوئی جیسی پن کو استعمال کیا جاتا تھا۔
مگر اب پنز کا حجم چھوٹا کیا جا رہا ہے جبکہ ان کا نچلا حصہ موٹے گول پوائنٹ جیسا ہوگا،ہر پن کے نچلے گول حصے میں سفید جبکہ اوپر کے حصے میں دیگر رنگ استعمال کیے جائیں گے،مثال کے طور پر میوزیمز کے لیے اب جامنی یا ہوٹلوں کے لیے نارنجی رنگ کی پنز استعمال کی جائیں گی۔
اس نئے ڈیزائن سے گوگل میپس کی سکرین پر زیادہ پنز کو استعمال کرنے میں مدد ملے گی،گوگل میپس کے اینڈرائیڈ، آئی او ایس اور ویب ورژن کے صارفین کے لیے اس ڈیزائن کو متعارف کرا دیا گیا ہے۔
واضح رہے یہ گوگل کی جانب سے میپس میں متعارف کرائے جانے والی واحد تبدیلی نہیں، حالیہ ہفتوں میں گوگل کی اس مقبول سروس میں کافی نئی تبدیلیاں کی گئی ہیں، جولائی 2024 کے اختتام پر گوگل میپس کی موبائل ایپ کا ڈیزائن بھی تبدیل کیا گیا تھا۔
