اسرائیلی پولیس کا کرسمس منانے والوں پر تشدد، کئی افراد گرفتار
تل ابیب: (ویب ڈیسک) اسرائیلی پولیس اور یہودی آباد کاروں نے کرسمس کے موقع پر مسیحی برادری کے خلاف کارروائیاں کیں اور ان پر تشدد کیا۔
غیر ملکی خبر ایجنسی کے مطابق اسرائیلی پولیس نے حیفہ اور مغربی کنارے میں واقع شہر بیت لحم میں کرسمس منانے والے افراد پر بہیمانہ تشدد کیا اور کئی افراد کو گرفتار بھی کیا، وائرل ویڈیوز میں دیکھا جا سکتا ہے کہ پولیس اہلکار سانتا کلاز کے لباس میں ملبوس شہریوں کو زبردستی گرفتار کر رہے ہیں۔
مقبوضہ مغربی کنارے میں اسرائیلی آباد کاروں نے کرسمس ٹری کو آگ لگا دی، اسرائیلی پولیس نے حیفہ میں اچانک موسیقی ہال میں داخل ہو کر کرسمس کی تقریب رکوا دی اور وہاں موجود سامان بھی ضبط کر لیا۔
دوسری جانب مقبوضہ مغربی کنارے میں اسرائیلی پابندیوں کے باوجود فلسطینی مسیحی برادری کرسمس کی تقریبات منا رہی ہے، بیت اللحم میں 25 دسمبر کی تقریبات غزہ پر جنگ کے آغاز کے بعد پہلی مرتبہ منعقد ہوئیں۔
