×

دنیا

روس نے ایک دن میں یوکرین کے 903 ڈرونز اور 4 نیپچون میزائل مار گرائے، وزارت دفاع

بند کریں

ماسکو: (شاہد گھمن سے) روس کی وزارت دفاع نے دعویٰ کیا ہے کہ روسی فضائی دفاعی نظام نے گزشتہ 24 گھنٹوں کے دوران یوکرین کے 903 فکسڈ ونگ ڈرونز، چار طویل فاصلے تک مار کرنے والے نیپچون گائیڈڈ میزائل اور دو گائیڈڈ فضائی بم مار گرائے ہیں۔

روسی حکام کے مطابق یوکرین کے خلاف جاری فوجی کارروائیوں کے دوران مختلف محاذوں پر یوکرینی فوج کو بھاری جانی اور عسکری نقصانات کا سامنا کرنا پڑا ہے۔

روسی وزارت دفاع کی جانب سے 7 نومبر کو جاری کردہ بیان کے مطابق فضائی دفاعی نظام نے گزشتہ ایک روز کے دوران یوکرین کی جانب سے استعمال کیے جانے والے مجموعی طور پر 903 فکسڈ ونگ بغیر پائلٹ طیاروں کو تباہ کیا، اس کے علاوہ چار نیپچون میزائل اور دو گائیڈڈ فضائی بم بھی فضا میں ہی مار گرائے گئے۔

وزارت دفاع نے بتایا کہ روسی فوج نے یوکرین کے ایک ریڈار اسٹیشن کو بھی تباہ کردیا، جبکہ مختلف علاقوں میں یوکرینی فوج کے گولہ بارود کے ذخائر، زمینی روبوٹک نظام اور ڈرونز کی تیاری اور ذخیرہ کرنے کے مقامات کو نشانہ بنایا گیا۔

روسی حکام کے مطابق ان حملوں میں یوکرینی فوجیوں اور غیر ملکی جنگجوؤں کی عارضی تعیناتی کے مقامات کو بھی نشانہ بنایا گیا۔

وزارت دفاع کا کہنا ہے کہ ان کارروائیوں کا مقصد یوکرینی فوج کی عسکری صلاحیتوں، اسلحے کی فراہمی اور بغیر پائلٹ جنگی نظام کے بنیادی ڈھانچے کو نقصان پہنچانا تھا۔

روسی وزارت دفاع نے مزید دعویٰ کیا کہ گزشتہ 24 گھنٹوں کے دوران مختلف جنگی محاذوں پر یوکرینی مسلح افواج کو مجموعی طور پر تقریباً 1155 فوجیوں کا نقصان اٹھانا پڑا۔

روسی فوج کے شمالی گروپ کی کارروائیوں کے علاقے میں یوکرینی فوج کو 150 سے زیادہ اہلکاروں کا نقصان پہنچنے کا دعویٰ کیا گیا، جبکہ مغربی گروپ کے محاذ پر یہ تعداد 220 سے زیادہ بتائی گئی۔

وزارت دفاع کے مطابق جنوبی گروپ کے زیرِ ذمہ داری علاقوں میں یوکرینی فوج کو 200 تک اہلکاروں کا نقصان ہوا، جبکہ مرکزی گروپ کے محاذ پر سب سے زیادہ، یعنی 345 تک فوجیوں کے نقصان کا دعویٰ کیا گیا۔

اسی طرح مشرقی گروپ کے محاذ پر 205 تک اور دنیپر گروپ کے زیرِ ذمہ داری علاقوں میں 35 تک یوکرینی اہلکاروں کے نقصان کی اطلاع دی گئی۔

روسی وزارت دفاع نے یوکرین میں فوجی کارروائی کے آغاز سے اب تک یوکرینی فوج کے مجموعی عسکری نقصانات کے اعداد و شمار بھی جاری کیے ہیں۔

روسی حکام کے مطابق اب تک 674 جنگی اور دیگر طیارے، 284 ہیلی کاپٹر، 2 لاکھ 81 ہزار 946 بغیر پائلٹ طیارے، 672 طیارہ شکن میزائل نظام، 31 ہزار 558 ٹینک اور دیگر بکتر بند جنگی گاڑیاں تباہ کی جاچکی ہیں۔

وزارت دفاع کے اعداد و شمار کے مطابق تباہ کیے جانے والے فوجی سازوسامان میں 1795 ملٹی پل راکٹ لانچر نظام، 36 ہزار 876 فیلڈ آرٹلری گنز اور مارٹرز، جبکہ 76 ہزار 559 خصوصی فوجی گاڑیاں بھی شامل ہیں۔

روسی وزارت دفاع کا کہنا ہے کہ یوکرین میں مختلف محاذوں پر فوجی کارروائیاں جاری ہیں اور روسی افواج یوکرینی فوج کے عسکری اہداف، گولہ بارود کے ذخائر اور ڈرونز سے متعلق تنصیبات کو نشانہ بنا رہی ہیں۔

واضح رہے کہ یہ اعداد و شمار روسی وزارت دفاع کی جانب سے جاری کیے گئے ہیں اور ان کی آزاد ذرائع سے تصدیق نہیں ہوسکی ہے۔