وقت سے پہلے سفید ہوتے بالوں کا گھریلو علاج
ہر وہ بیماری جو پُرانے وقتوں میں بزرگی کی نشانی سمجھی جاتی تھی آج بچوں اور جوانوں کو لاحق ہو رہی ہے۔لوگوں کے دانت بڑی عمر میں گرنے لگتے تھے۔آج شوگر کے شکار نوجوان بھی دانتوں کے مسائل سے دو چار ہیں۔
میٹھے کے شوقین بچے دانتوں میں تکلیف اور کیڑا لگنے کی شکایت کرتے نظر آتے ہیں۔گھٹنوں اور کمر کے در د میں صرف بزرگ مبتلا ہوا کرتے تھے۔آج ہر دوسرا نوجوان ٹانگیں اور کمر پکڑے نظر آتا ہے۔بچے تک سر درد کی شکایت کرنے لگے ہیں۔یہ صورتحال یقینا پریشان کُن ہے۔نوکریاں کرنے والوں پر کام کا اس قدر بوجھ ہے کہ انہیں سر کھجانے تک کی فرصت نہیں ملتی تو بھلا وہ اپنے آرام اور خود پر توجہ دینے کی خاطر وقت کہاں سے نکالیں ۔ ایسا ہی کچھ حال بچوں کا بھی ہے۔مشکل پڑھائیوں اور کتابوں سے بھرے بڑے بڑے بیگز کے بوجھ سے نہ صرف ان کی بینائی متاثر ہو رہی ہے بلکہ دماغی کارکردگی پر بھی اثر پڑ رہا ہے، اور ہم سب بخوبی جانتے ہیں کہ دماغی کمزوری بالوں کی سفیدی کی صورت میں بھی ظاہر ہوتی ہے۔شاید یہی وجہ ہے کہ آج بزرگوں سے زیادہ بچے اور نوجوان بالوں کی سفیدی کا شکار ہو رہے ہیں۔ چھوٹی عمر میں بالوں کو مہنگے ہیئر کلر سے رنگنا بھی اچھا نہیں ہوتا، کیونکہ ان میں کیمیکل موجود ہوتے ہیں۔اس کے علاوہ اضافی خرچہ بھی ہونے لگتا ہے،لیکن قدرت نے ہمارے ہر مسئلے کا حل اپنی عطا کردہ نعمتوں میں رکھا ہے۔درج ذیل مضمون میں آج ہم آپ کو قدرتی چیزوں سے بالوں کو مستقل کالا کرنے کے چند گھریلو ٹوٹکے بتا رہے ہیں جو یقینا آپ کے لیے کار آمد ثابت ہوں گے۔
تھوڑے سے آملے اور اس میں تقریباً برابر کی مقدار سیکا کائی ملا کر رات کو کچے دودھ میں بھگو دیں۔صبح اس کو سر پر اچھی طرح لگائیں اور خشک ہونے کے لیے چھوڑ دیں۔ جب سوکھ جائے تو اچھے شیمپو سے بالوں کو دھو لیں۔اس سے ایک ہی بار میں فائدہ نہیں ہو گا بلکہ ہفتے میں دوبار لازمی استعمال کریں۔چند بار کے استعمال سے ہی آپ کے بال قدرتی طور پر کالے ہونے لگیں گے۔بہترین نتائج کے لیے ایک بار بال کالے ہو جائیں تو ہر کچھ عرصے بعد بھی اس کا استعمال کرتے رہیں۔اگر بال وقت سے پہلے کمزوری سے سفید ہو جائیں تو ہر کھانے کے بعد اخروٹ کھا لیا کریں۔ اسے ایک ماہ تک اپنے معمول میں شامل کریں۔چند ہفتوں بعد ہی بال کالے ہونے لگیں گے۔
بالوں کو سفید ہونے اور جھڑنے سے بچانے کے لیے سیکا کائی ،ماش کی دال اور میتھی سل پر باریک پیس کر اس سے سر دھونے کی عادت اپنائیں۔اس کے مسلسل استعمال سے نہ صرف آپ کے بال جھڑنا بند ہو جائیں گے بلکہ آہستہ آہستہ سفید ہوتے بال کالے ہونے لگیں گے۔
ہفتے میں دو بار آملے اور بہرون کا سفوف رات کو ایک لوہے کے برتن میں بھو دیں اور صبح اس سے بال دولینے سے چند ہفتوں بعد ہی بال کالے ہونے لگیں گے۔اس کے علاوہ بالوں کی سفیدی دور کرنے کے لیے روزانہ زیتون کا تیل لگایا کریں۔ایک،دو ہفتے میں ہی فرق نظر آنے لگے گا۔
بالوں کی سفیدی دور کرنے کے لیے گھر پر تیل تیار کریں۔تیل بنانے کے لیے آس کے پتے چار چمچ،آکاس بیل چار چمچ،پرمیا شام چار چمچ اور میتھی دانہ چار چمچ لے لیں۔ کالے تل یا سرسوں کے تیل میں ان چاروں کو ڈال کر ہلکی آنچ پر پکائیں اور ٹھنڈا کر کے بوتل میں ڈال کے رکھ لیں۔ ہفتے میں دو بار اسے رات کو لگائیں تو انشاء اللہ سفید ہوتے بال کالے ہونے لگیں گے اور خشکی سکری کا بھی خاتمہ ہو جائے گا۔
