زکوٰۃ کے شرعی مسائل مالی عبادت معاشرے میں توازن پیدا کرنے کا سبب
معدنیات پر 1/5، بارانی زمین پر 1/10، غیر بارانی زمین پر 1/20، سونا،چاندی اور مال تجارت پر 1/40 زکوٰۃ کی شرح مقرر ہے زیورات کی مالکہ عورت ہو تو ان کی زکوٰۃ ادا کرنا عورت کے ذمہ داری ہے، اگر عورت کو مالک نہیں بنایا گیا تو زکوٰۃ شوہر کے ذمہ ہوگی
قرآن مجید اور احادیث میں نمازکے ساتھ اور نمازکے بعد جس عبادت کا سب سے زیادہ ذکر کیا گیا ہے وہ زکوٰۃ ہے۔ زکوٰۃ کی وجہ سے معاشرے کے امیر اور سرمایہ دار طبقہ اور معاشرے کے نادار فقراء ومساکین غرباء کے درمیان توازن پیدا ہوتا ہے۔
زکوٰۃکا لغوی معنی: لغت میں زکوٰۃ کا معنی پاکیزگی، بڑھنا، برکت اور مدح ہے۔ اور یہ تمام معانی قرآن وحدیث میں استعمال ہوئے ہیں۔
شرعی معنی: سال گزرنے کے بعد معین نصاب سے زکوٰۃ کی نیت سے کسی غریب کو ایک حصہ ادا کرنا زکوٰۃ کہلاتا ہے۔ (عمدۃ القاری، ج8، ص223)
زکوٰۃکے واجب ہونے کی شرائط: جس شخص پرزکوٰۃ واجب ہوتی ہے اس میں درج ذیل شرائط کا پایا جانا ضروری ہے۔ ایک مسلمان ہونا، دوئم بالغ ہونا،سوئم عقلمند ہونا، چہارم آزاد ہونا، پنجم مقروض نہ ہونا، ششم نصاب حاجت اصلیہ سے فارغ ہو (جیسے مکان، کپڑا، سواری، گھریلوسامان وغیرہ)، ہفتم زکوٰۃ کے نصاب پر مکمل سال گزرنا۔
زکوٰۃکے اموال: وہ مال جس پر زکوٰۃ فرض ہے اس میں معدنیات، زرعی پیداوار، جانور، سونا،چاندی، مال تجارت شامل ہیں۔
مختلف مالوں پرزکوٰۃ کی شرح: رسول اللہﷺ نے نہایت حکیمانہ طریقہ سے پیداوار کی مختلف قسموں پرشرح زکوٰۃ مقرر فرمائی ہے۔ سب سے پہلے پیداور کی ان اقسام پر زکوٰۃ مقرر فرمائی جو کچھ عرصہ تک محفوظ رہ سکتی ہیں۔ تاکہ ان سے مرضی کے مطابق نجی اورکاروباری فائدہ اٹھایا جا سکے جیسے زرعی پیداوار وغیرہ۔ جن چیزوں میں ترقی اور نشوونما کی صلاحیت نہیں ہے ان پر زکوٰۃ مقرر نہیں کی گئی، جیسے مشینری، آلات وغیرہ۔ جس مال کو حاصل کرنے میں مالک کی محنت نہیں بلکہ وہ عطیہ خداوندی ہے اس پر زکوٰۃ کی شرح سب سے زیادہ ہے،جس مال کوحاصل کرنے، اسے محفوظ رکھنے کیلئے محنت اورکوشش زیادہ ہے اس میں زکوٰۃ کی شرح کم رکھی گئی ہے۔ معدنیات کی شرح زکوٰۃ 1/5،بارانی زمین جوبارش سے سیراب ہو اس پر1/10، غیر بارانی زمین یعنی جسے سیراب کرنے پر مشقت اور خرچ آئے اس پر 1/20، سونا،چاندی اور مال تجارت پر 1/40 زکوٰۃ کی شرح مقررکی گئی ہے۔
زکوٰۃکیلئے مختلف مالوں کے نصاب
معدنیات: اس کیلئے کوئی نصاب مقرر نہیں بلکہ جو بھی زمین سے نکلے اس کا پانچواں حصہ بطور زکوٰۃ اداکرنا ہو گا۔
زرعی پیداوار: اس کا بھی کوئی نصاب مقرر نہیں۔ پیداوار تھوڑی ہو یا زیادہ ،زمین کے حساب سے اس پر زکوٰۃ (عشر) ہو گی۔
سونا، چاندی: اس کا نصاب ساڑھے سات تولہ سونا ہے جبکہ چاندی کا نصاب ساڑھے باون تولہ ہے۔
مال تجارت: خام مال یا تیار شدہ مصنوعات جب ان کی قیمت ساڑھے باون تولہ چاندی کے برابر ہو تو اس پر زکوٰۃ واجب ہو گی۔
جانور: اونٹ کا نصاب 5 اونٹ ہیں،گائے بھینس کا نصاب 30 جانور ہے، بھیڑ بکریوں کا نصاب 40 جانور ہے۔
زکوٰۃ کے ضروری مسائل: نصاب کی مقدار پر سال کا گزرنا ضروری ہے یعنی اس مال پر زکوٰۃ فرض ہو گی جو سال کا اکثر حصہ مالک کے پاس ہو۔ البتہ سال کا گزرنا صرف نصاب کی مقدار پر ضروری ہے۔ نصاب کی مقدار سے زائد مال اگرچہ کچھ دن پہلے ہی پاس آیا ہو تو اس پر زکوٰۃ کی ادائیگی لازمی ہو گی۔
سونے اورچاندی کی زکوٰۃ سونے چاندی سے بھی ادا کی جا سکتی ہے، ساڑھے سات تولہ سوناکی زکوٰۃ 2ماشے ہے جبکہ ساڑھے باون تولہ چاندی کی زکوٰۃ 1تولہ 3ماشے 6رتی ہے اور ان کی زکوٰۃ قیمت سے بھی ادا کی جا سکتی ہے۔سونے چاندی کی موجودہ مالیت لگوائی جائے اور اس حساب سے چالیسواں حصہ 2.5فیصد بطور زکوٰۃ ادا کیا جائے۔
اسی طرح مال تجارت کی بھی اوسط نکال کر موجودہ مالیت کے اعتبارسے زکوٰۃ ادا کی جائے۔
نقد رقم جو ساڑھے باون تولہ چاندی کی مالیت کے برابر ہو اس پر بھی زکوٰۃ فرض ہو گی۔
جن زیو رات کی مالکہ عورت ہو ان کی زکوٰۃ ادا کرنا عورت کے ذمہ ہے۔ البتہ اگر شوہر بھی ادا کر دے تو زکوٰۃ ادا ہو جائے گی۔ اگر عورت کے زیورات صرف پہننے کیلئے دیے گئے ہوں اسے مالک نہ بنایا گیا ہو، مالک شوہر ہو تو زکوٰۃ ادا کرنا شوہر کے ذمہ ہو گا۔
جو اشیاء کرایہ پر دی جاتی ہوں مثلاً گاڑیاں، دریاں، کرسیاں، میزیں، ٹینٹ وغیرہ اسی طرح مکانات اور دوکانیں اگر ان سے حاصل ہونے والی آمدنی نصاب کی مقدار کے برابر ہو اور اس پر سال گزر جائے تو اس آمدنی پر زکوٰۃ واجب ہو گی۔
جسے زکوٰۃ کا مال دیا جائے اسے اس کا مالک بھی بنایا جائے تاکہ وہ اسے اپنی مرضی سے خرچ کر سکے۔
اسلام نے غرباء اور ضرورت مندوں کی مدد کیلئے اخلاق اور قانون دونوں سے کام لیا ہے۔ زکوٰۃ کی صورت میں نقد اور عشر کی صورت میں زمین سے پیدا ہونے والی اجناس پر مقرر و متعین شرح سے آمدنی کا ایک حصہ صاحب ثروت لوگوں سے قانوناً لے کر ضرورت مندوں کی کفالت کا بندوبست کیا اور یہ کام اسلامی حکومت کے اولین فرائض میں شامل کردیا۔ ارشاد باری تعالیٰ ہے: ’’وہ لوگ کہ اگر ہم ان کو زمین میں اختیار و اقتدار دیں تو نماز قائم کریں اور زکوٰۃ دیں اور نیکی کا حکم دیں اور برائی سے روکیں‘‘(الحج، 22: 41)۔
مصارفِ زکوٰۃ : زکوٰۃ کا مال جن لوگوں پر خرچ کیا جا سکتا ہے ان کے متعلق قرآن مجید میں ارشاد باری تعالیٰ ہے: ’’زکوٰۃ تو صرف ان لوگوں کیلئے ہے جو محتاج اور نادار ہوں، اور جو اس کی تحصیل پر مقرر ہیں، اور جن کے دلوں کو اسلام سے الفت دی جائے ، اور گردنیں آزاد کرنے میں اور قرض داروں کو اور اللہ کی راہ اور مسافر کو، یہ ٹھہرایا ہوا ہے اللہ کی طرف سے، اور اللہ علم و حکمت والا ہے‘‘۔(التوبۃ، 9: 60)
اس آیت مبارکہ میں آٹھ مصارفین کا ذکر موجود ہے۔فقراء، مساکین، عاملین زکوٰۃ (زکوٰۃ اکٹھی کرنے والے)، مؤلف القلوب، غلام کی آزادی، مقروض، فی سبیل اللہ،مسافر۔ قرآن کریم میں زکوٰۃ کے یہ آٹھ مصارف ذکر ہوئے ہیں، احناف کے نزدیک ان میں سے کسی بھی مصرف میں زکوٰۃ دینے سے ادائیگی ہو جائے گی اور دینے والا دینی فریضہ سے سبکدوش ہو جائے گا۔ (ہدایہ، ج2، ص215)،ذیل میں مصارف زکوٰۃ کی اختصار کے ساتھ کچھ تفصیل بیان کی جاتی ہے۔
فقیر و مسکین : فقیر اور مسکین دونوں ہی مالی ضروریات کیلئے دوسروں کے مالی تعاون کے محتاج ہیں دونوں کو زکوٰۃ دی جا سکتی ہے۔
والعاملین علیہا : وہ لوگ جو زکوٰۃ و عشر جمع کرنے پر مامور ہوں، ان سب کو زکوٰۃ فنڈ سے اجرت یا تنخواہ دی جائے گی خواہ امیر ہوں خواہ غریب۔
مؤلفۃ القلوب : زکوٰۃ وعشر کاچوتھا مصرف مؤلفۃ القلوب ہیں یعنی وہ لوگ جن کی تالیف قلب مقصود ہے۔ تالیف قلب کا مطلب ہے دل موہ لینا، مائل کرنا، مانوس کرنا۔ اس حکم خداوندی کا مقصد یہ ہے کہ جو لوگ اسلام کے سخت مخالف ہیں اور مال دے کر ان کی مخالفت ختم کی جا سکتی ہے یا ایسے نادار کافر جن کی مالی امداد کرکے ان کو اسلام کی طرف مائل کیا جاسکتا ہے۔ یا وہ لوگ جو نئے نئے مسلمان ہوں اور ان کی مناسب مالی مدد نہ کی گئی تو امکان ہے کہ وہ اپنی کسمپرسی اور کمزوری کی بناء پر پھر کفر کی طرف پلٹ جائیں گے۔
فی الرقاب: گردنیں چھڑانے میں اسلام سے پہلے دنیا کے اکثر ممالک میں غلامی کا دور دورہ تھا، کمزور، نادار، اور پسماندہ انسانوں کو طاقتور لوگ اپنا غلام بنا لیتے تھے۔ یونہی لڑائیوں اور جنگوں میں غالب قوم، مغلوب قوم کو اپنا غلام بنا کر ان کے گھر بار زمین جائیداد یہاں تک کہ ان کی جانوں کی مالک بن جاتی تھی۔ اسلام نے انسانی غلامی کو جرم قرار دیا، ان کو قانوناً و اخلاقاً کئی طریقوں سے آزاد کرنے کا دروازہ کھول دیا۔ جس کے نتیجہ میں تھوڑے ہی عرصہ میں دنیا اس لعنت سے پاک ہو گئی۔
الغارمین : ’’والغارمین‘‘ اور قرضداروں کو یعنی مال زکوٰۃ سے قرض داروں کے قرض بھی ادا کئے جا سکتے ہیں۔
و فی سبیل اللہ : ’’اور اللہ کے راستے میں‘‘ امام یوسف ؒ نے اس سے فی سبیل اللہ جہاد کرنے والے مجاہدین مراد لئے ہیں اور امام محمدؒ کے نزدیک وہ عازمین حج جو راستے میں مالی مدد کے محتاج ہوں۔ کچھ علماء کے نزدیک طالب علم مراد ہیں۔ امام کاسانی حنفی ؒ نے فرمایاہے: فی سبیل اللہ سے مراد ہے تمام نیکی کے کام، اس میں ہر وہ شخص شامل ہے جو اللہ کی اطاعت اور نیک کاموں میں تگ ودو کرے۔ جب کہ (زکوٰۃ کا) حاجت مندہو۔ (بدائع الصنائح، 2 : 45)
ابن سبیل : زکوٰۃ کا آٹھواں مصرف مسافر ہے۔ خواہ گھر میں مالدار ہو مگر سفر میں تنگدست ہو جائے اور مالی تعاون کا محتاج ہو، تو زکوٰۃ سے اس کی مالی مدد کی جائے گی۔ اس سے مراد وہ شخص ہے جس کے وسائل و اسباب گھر ٹھکانہ اور مال سفر میں ہونے کی وجہ سے اس کی دسترس سے باہر ہیں۔ اس کو مال زکوٰۃ سے دیاجائے گا اگرچہ اپنے شہر میں امیر ہو۔(الجامع الاحکام القرآن للقرطبی، 8: 119،بدائع الصنائع کاسانی، 2: 46)
وہ افرادجن کوزکوٰۃ نہیں دی جا سکتی:باپ، ماں، دادا، دادی، نانا، نانی، بیٹا، بیٹی، پوتا، پوتی، نواسا، نواسی) کو زکوٰۃ، صدقہ فطرنہیں دیا جا سکتا۔ اصول و فروع کے علاوہ باقی رشتہ دار بھائی، بہن ان کی اولاد، چچا، پھوپھی اور ان کی اولاد، ماموں، خالہ اور ان کی اولاد اگر مستحق ہوں تو انہیںزکوٰۃ دی جا سکتی ہے بلکہ انہیں زکوٰۃ دینے کا دگنا اجر ہے۔
مقروض پرزکوٰۃ واجب نہ ہو گی ،البتہ وہ قرض جو صنعتی یا کاروباری ادارے کے خام مال یا مصنوعات پر زکوٰۃ کیلئے مانع نہ ہو گا بلکہ ان پر زکوٰۃ کی ادائیگی لازم ہو گی۔
زکوٰۃ ساری اکٹھی بھی دی جاسکتی ہے اور تھوڑی تھوڑی کرکے بھی دی جا سکتی ہے۔ غیر مسلم کو زکوۃ یا صدقہ فطر دینا جائز نہیں ہے۔
٭دینی طلباء پرایک روپیہ خرچ کرنا، باقی امور میں لاکھوں صدقہ و خیرات کرنے سے افضل ہے ۔ (مکتوبات،ج1،ص160)
