شال، دوپٹہ اور کوٹ پہننے کے سٹائل
سردیوں کا موسم خواتین کے فیشن میں تنوع اور نفاست لے کر آتا ہے۔ اس موسم میں شال، دوپٹہ اور کوٹ نہ صرف جسم کو گرم رکھتے ہیں بلکہ شخصیت، وقار اور انداز کو بھی نمایاں کرتے ہیں۔ درست سٹائل کا انتخاب خواتین کے لباس کو عام سے خاص بنا سکتا ہے۔
شال، دوپٹہ اور کوٹ پہننے کے مختلف سٹائلز پر تفصیلی گفتگو کی جا رہی ہے جو روزمرہ زندگی سے لے کر تقریبات تک ہر موقع کے لیے موزوں ہیں۔
شال پہننے کے سٹائل
شال سردیوں کی پہچان سمجھی جاتی ہے۔ روایتی کشمیری شال ہو یا جدید پشمینہ اس کا صحیح انداز پورے لباس کو نکھار دیتا ہے۔ سادہ اور کلاسک سٹائل یہ ہے کہ شال کو دونوں کندھوں پر یکساں انداز میں ڈال لیا جائے۔ یہ سٹائل دفتری خواتین اور سنجیدہ تقریبات کے لیے بہترین ہے۔جدید انداز میں ایک کندھے پر شال ڈال کر دوسرے سرے کو بازو پر چھوڑ دیا جاتا ہے جو نوجوان خواتین میں خاصا مقبول ہے۔بیلٹ کے ساتھ شال پہننا بھی آج کل فیشن میں ہے۔ اس انداز میں شال کو کندھوں پر ڈال کر کمر پر پتلی بیلٹ باندھ لی جاتی ہے جس سے لباس سٹائلش نظر آتا ہے۔سرد علاقوں میں شال کو سکارف کے انداز میں گلے کے گرد لپیٹنا نہ صرف گرم رکھتا ہے بلکہ جینز، ٹراؤزر اور لانگ شرٹس کے ساتھ جدید لُک بھی دیتا ہے۔
دوپٹہ پہننے کے سٹائل
دوپٹہ خواتین کے مشرقی لباس کا حسن ہے۔ چاہے شلوار قمیض ہو یا لانگ فراک، دوپٹے کا انداز پورے لباس کا تاثر بدل دیتا ہے۔روایتی انداز میں دوپٹہ سر پر رکھ کر دونوں طرف برابر چھوڑا جاتا ہے جو مشرقی وقار اور سادگی کی علامت ہے۔ایک طرفہ سٹائل میں دوپٹہ ایک کندھے پر ڈالا جاتا ہے اور دوسرا سرا کھلا چھوڑ دیا جاتا ہے، یہ انداز تقریبات اور نیم رسمی مواقع پر جچتا ہے۔بیلٹ یا پن کے ساتھ دوپٹہ فکس کرنا جدید فیشن کی نمائندگی کرتا ہے خاص طور پر پارٹی ویئر میں یہ انداز نہایت مقبول ہے۔سردیوں میں مخمل، اون یا کھدر کے دوپٹے کو شال کے انداز میں بھی استعمال کیا جا سکتا ہے جو فیشن اور سہولت دونوں فراہم کرتا ہے۔
کوٹ کے سٹائل
کوٹ سردیوں کا سب سے اہم اور نمایاں لباس ہے۔ لانگ کوٹ، شارٹ کوٹ اور کیپ سٹائل کوٹ ہر عمر کی خواتین میں مقبول ہیں۔لانگ کوٹ کو سیدھی شلوار یا ٹراؤزر کے ساتھ پہننا قد کو لمبا اور شخصیت کو باوقار ظاہر کرتا ہے۔ شارٹ کوٹ جینز اور ٹاپ کے ساتھ بہترین لگتا ہے اور نوجوانوں کے لیے سمارٹ لُک فراہم کرتا ہے۔بیلٹڈ کوٹ کمر کو نمایاں کرتا ہے اور رسمی مواقع کے لیے بہترین انتخاب ہے۔اون یا ٹوئیڈ کے کوٹ کے ساتھ ہلکے رنگ کی شال یا دوپٹہ شامل کر لیا جائے تو مجموعی انداز مزید دلکش ہو جاتا ہے۔
درست انتخاب کی اہمیت
شال، دوپٹہ اور کوٹ کا انتخاب کرتے وقت رنگ، کپڑے اور موقع کو مدنظر رکھنا بے حد ضروری ہے۔ ہلکے رنگ دن کے وقت اور گہرے رنگ شام یا رات کی تقریبات کے لیے موزوں ہوتے ہیں۔ اسی طرح سادہ لباس کے ساتھ بھاری شال یا دوپٹہ اور بھاری لباس کے ساتھ سادہ سٹائل زیادہ متوازن نظر آتا ہے۔ شال، دوپٹہ اور کوٹ صرف سردی سے بچاؤ کا ذریعہ نہیں بلکہ خواتین کی شخصیت، ذوق اور ثقافتی پہچان کا اظہار بھی ہیں۔ درست سٹائل اپنا کر ہر خاتون بااعتماد، باوقار اور خوبصورت نظر آ ئے گی ۔
