رہنمائے گھرداری:موسم سرما کے امراض کا گھریلو علاج
موسم سرما میں بچے بڑے سب کھانسی ، نزلہ ، زکام اور بخار میں مبتلا ہوجاتے ہیں۔ مختلف قسم کے وائرس ، موسم کی ٹھنڈک ، سرد ہوائیں اور الرجی نزلہ زکام اور دیگر بیماریوں کاسبب بنتے ہیں۔ ہم میں سے اکثر لوگ آگہی نہ ہونے کی وجہ سے ڈاکٹر کے پاس جانے پر مجبور ہوتے ہیں۔ ادویات کے علاوہ کچھ دیسی طریقہ کار بھی موجود ہیں جن کے ذریعے گھر پر ہی نزلہ زکام ، کھانسی اور بخار کو کنٹرول کیا جا سکتا ہے۔ حکیم اس ضمن میں جو ٹوٹکے بتاتے ہیں ان میں سے چند درج ذیل ہیں۔
ایک چمچ شہد میں چند قطرے ادرک کا رس ملا لیں۔ یہ آمیزہ نیم گرم پانی کے ساتھ نزلہ، زکام، کھانسی اور ٹھنڈ سے متاثرہ بچوں کو پلائیں۔ یہ نسخہ ایک سال سے کم عمر بچوں پر آزمانے سے گریز کریں۔
بچوں کو ٹھنڈ لگ جانا
لہسن کے چند جوے اور ایک چمچ اجوائن کو توے پر سینک کرململ کے کپڑے میں باندھ کر پوٹلی بنا لیں۔ تھوڑا ٹھنڈا ہونے پر اس پوٹلی کو سوئے ہوئے بچے کے نزدیک رکھ دیں۔ یہ ٹوٹکا ٹھنڈ ختم کرنے کیلئے مفید ہے۔
سینے کی جکڑن
کھانسی ، سینے کی جکڑن اور بخار سے آرام کیلئے ایک پیالی گرم پانی میں تازہ ادرک کچل کراس کا ایک چائے کا چمچ رس شہد کے ساتھ ملاکر پئیں۔ اس سے بلغم خارج ہوتا ہے اور پسینہ آکربخار دور ہوجاتا ہے۔ ایک چائے کا چمچ تلسی کے تازہ پتوں کا رس ملانے سے یہ اور بھی مفید ہو جاتا ہے۔ تلسی کے خشک پتے بھی استعمال کیے جاسکتے ہیں۔
کھانسی کا شربت خود بنائیں
چھوٹے بچوں کے لیے گھر میں کھانسی کا شربت تیار کیا جا سکتا ہے ۔ ادرک، تلسی، بڑی الائچی اور کالی مرچیں لے کر پانی میں جوش دیں۔ چولہا بند کرنے کے بعد اسے ٹھنڈا کرلیں، اسے ذائقہ دار اور مزید مؤثر بنانے کیلئے حسب ضرورت شہد شامل کرکے بچوں کو پلائیں۔
گلے کا درد
اکثر لوگوں کو موسم سرما میں ٹھنڈا پانی، کولڈ ڈرنک یا گرین ٹی میں لیموں کا استعمال نقصان پہنچاتا ہے اور وہ گلے کے درد میں مبتلا ہو جاتے ہیں۔ ایسے لوگوں کیلئے ایک مفید ٹوٹکا بتا رہی ہوں، اسے نوٹ کر لیں، انشااللہ آپ کے بہت کام آئیگا۔ اگر گلے میں شدید درد ہوتو پیاز کارس نکال کر ایک چمچ پی لیں۔ یہ عمل چند دن دہرائیں انشا اللہ گلے کو درد ختم ہو جائے گا۔
ناک بند ہونا
اکثر مرد و خواتین کو موسم سرما میں ناک بند ہونے کی شکایت ہو جاتی ہے۔ ایسے لوگوں کو چاہئے کہ آدھاکپ پانی لیں اور اسے گرم کر لیں۔ اس میں سیب کا سرکہ اور چٹکی بھر پسی ہوئی لال مرچ ڈالیں اور مکس کر کے پی لیں۔ دن میں دو بار یہ عمل دہرائیں۔
