مسائل اور ان کا حل
لڑکے والوں کی طرف سے دیا گیا زیور کس کی ملکیت ہے ؟ سوال :میری بیٹی کو میرے دامادنے تحریری طورپر3 طلاقیںدے دی ہیں۔ لڑکی کو اس کے والدین کی طرف سے ملنے والا جہیز کاسامان اور سونا تو لڑکے والے واپس کرنے کیلئے تیار ہیں، لیکن جو سونا لڑکے والوں کی طرف سے لڑکی کو شادی میں دیاگیاتھااس کے بارے میں وہ کہہ رہے ہیں کہ یہ ہم نے زیبائش کیلئے دیاتھااس لئے یہ ہم نہیں دیں گے۔اب آپ رہنمائی فرمائیں کہ لڑکی اس سونے کی حقدارہے یا نہیں؟
جواب : جہیزاورجوزیورات لڑکی والوں کی طرف سے لڑکی کودیئے گئے ہیں، ان کی مالک لڑکی ہے اورجوزیورات لڑکے والوں کی طرف سے لڑکی کو دیئے گئے اگر واقعتاًاستعمال کیلئے دیئے گئے تھے (جیساکہ سوال سے معلوم ہوتا ہے )توان کامالک لڑکاہے ،تاہم جو زیورات لڑکی کومہرمیں دیئے ہوں یاباقاعدہ تصریح کرکے لڑکی کو مالکانہ طورپرھبہ کئے ہوں ان کی مالک لڑکی ہوگی۔
بیٹے کی مطلقہ سے نکاح
سوال : میرے ایک دوست کی شادی چند سال پہلے ہوئی تھی ۔کچھ عرصہ کے بعدلڑکے نے لڑکی کوطلاق دے دی۔لڑکی اس کے خاندان کی نہیں تھی بلکہ باہرسے یعنی دوسرے خاندان سے شادی کرکے لائی گئی تھی۔اب لڑکے کاباپ اس لڑکی سے شادی کرنا چاہتا ہے۔ آپ سے گزارش ہے کہ قرآن و حدیث کی روشنی میں فتویٰ دیں کہ یہ شریعت میں جائز ہے؟۔
جواب: صورت مسئولہ میں مذکورہ لڑکی بیٹے کے نکاح میں آنے کی وجہ سے باپ کیلئے محرم بن چکی ہے ،اب اس کالڑکے کے باپ سے نکاح نہیں ہو سکتا، لہٰذا اس سے احتراز لازم ہے۔(سورۃ نساء:آیت نمبر23)
ماموں اور بھانجے کی بیوی
کے درمیان پردے کا مسئلہ
سوال: کیا ماموں کا اپنے بھانجے کی بیوی سے پردہ ہے؟
جواب: ماموں اور بھانجے کی بیوی کے درمیان پردہ شرعاًضروری ہے ۔
نکاح کے وقت کلمہ پڑھوانا
سوال :کیا نکاح کے وقت دولہا سے کلمہ پڑھوانا ضروری ہے ؟
جواب :نکاح کے وقت کلمہ پڑھوانا نکاح کی شرائط میں سے نہیں ہے، لہٰذا عام حالات میں ہر ایک سے بوقت نکاح کلمہ پڑھوانا یا اسے لازم سمجھنا شرعاً درست نہیں ۔
نفلی صدقہ سے خود کھانا
سوال:کوئی شخص کھانے کی کوئی چیزصدقہ کرے، مثلا ًلوگوں کیلئے چاول کی دیگ پکائے۔ کیا اب اس میں سے خود کھا سکتا ہے؟ (زوہیب ظہیر، کراچی)
جواب :نفلی صدقہ کیلئے کوئی کھانا تیار کیا جائے اورپھراس میں سے کچھ خودکھالے اور کچھ بطورصدقہ فقراء کوکھلادے تویہ جائزہے، لیکن ثواب صرف اس کھانے کے صدقہ کا ہو گا جتنا فقراء نے کھایاہے ۔
دیر سے نماز فجرپڑھنے کی
صورت میں نمازکی نیت
سوال: اگر فجر کی نماز وقت پر نہ پڑھ سکے اور صبح اٹھتے ہی پڑھ لی جائے تو اس کی نیت قضا نماز کی کرے یا ادا کی ؟ (جہانزیب )
جواب: طلوع آفتاب کے بعد فجر کی نماز قضا ء ہوتی ہے لہٰذا اگر سورج طلوع ہونے کے بعد اداکی جائے تو قضاء اور پہلے کی جائے تو ادا ہوگی۔ نیز قضا ء نماز، قضاء اور ادا دونوں نیتوں سے شرعاً ادا ہوجاتی ہے۔
مصنوعی اعضا ء لگوانا
سوال:اگر حادثہ کی وجہ سے جسم کا کوئی حصہ ضائع ہوجائے تو کیا مصنوعی اعضاء لگوائے جا سکتے ہیں؟(نعمان، لاہور)
جواب: مصنوعی اعضاء لگوائے جا سکتے ہیں۔ اس میں شرعاً کوئی حرج نہیں ۔
