خوبانی: صحت بخش پھل
گرمیوں کے موسم میں آنے والے مزیدار پھلوں میں خوبانی ایک خاص مقام رکھتی ہے۔ اپنے سنہری زرد رنگ، خوشبودار ذائقے اور نرم گودے کی وجہ سے یہ بچوں اور بڑوں سب کی پسندیدہ ہوتی ہے۔
خوبانی نہ صرف کھانے میں لذیذ ہے بلکہ غذائیت سے بھرپور ہونے کے باعث صحت کیلئے بھی بے حد مفید سمجھی جاتی ہے۔
خوبانی کا درخت عموماً ٹھنڈے اور پہاڑی علاقوں میں اچھی طرح نشوؤنما پاتا ہے۔ پاکستان میں گلگت بلتستان، چترال، سوات، کوئٹہ، زیارت اور آزاد کشمیر خوبانی کی بہترین پیداوار کیلئے مشہور ہیں۔ موسم گرما میں اس کے درخت چھوٹے چھوٹے سنہری پھلوں سے لد جاتے ہیں، جو دیکھنے میں بھی بہت دلکش لگتے ہیں۔
خوبانی میں وٹامن اے، وٹامن سی، فائبر، پوٹاشیم اور دیگر اہم غذائی اجزا پائے جاتے ہیں۔ یہ آنکھوں کی صحت بہتر بنانے، ہاضمہ درست رکھنے اور جسم کے دفاعی نظام کو مضبوط بنانے میں مددگار ثابت ہوتی ہے۔ گرمی کے موسم میں تازہ خوبانی کھانے سے جسم کو توانائی ملتی ہے اور تازگی کا احساس ہوتا ہے۔
تازہ خوبانی کے علاوہ خشک خوبانی بھی بہت مقبول ہے۔ خشک خوبانی کو سال بھر کھایا جاتا ہے اور اسے مختلف میٹھے پکوانوں، کیک، کھیر، فروٹ چاٹ اور جوس میں بھی استعمال کیا جاتا ہے۔ بعض علاقوں میں اس سے مزیدار جام اور مربہ بھی تیار کیا جاتا ہے۔
دلچسپ بات یہ ہے کہ خوبانی کی گٹھلی کے اندر موجود بیج کو بعض مقامات پر کھانے کیلئے استعمال کیا جاتا ہے، جبکہ اس سے تیل بھی نکالا جاتا ہے جو مختلف مصنوعات میں کام آتا ہے۔
بچو! قدرت نے ہمیں بے شمار نعمتوں سے نوازا ہے اور خوبانی بھی ان میں سے ایک ہے۔ اگر ہم چپس، کولڈ ڈرنکس اور غیر صحت بخش غذاؤں کے بجائے تازہ پھل کھانے کی عادت اپنائیں تو ہم زیادہ صحت مند، توانا اور چاق و چوبند رہ سکتے ہیں۔ اس لیے موسم آئے تو خوبانی ضرور کھائیں اور صحت مند زندگی کا لطف اٹھائیں۔
