کچی سبزیوں کے پکے فوائد
اسپیشل فیچر
کچی سبزیوں کے فوائد کہیں نہ کہیں ہمارے لاشعور میں ہوتے ہیں، اسی لئے تودعوتوں میں سلاد کے بغیر ضیافت ادھوری سمجھی جاتی ہے۔ کچی سبزیوں کا سب سے بڑا فائدہ توبہرحال یہ ہے کہ انہیں ایسے ہی کھانے سے غذائیت ضائع نہیں ہوتی جبکہ پکانے میں اس بات کا احتمال ہوسکتا ہے۔ آئیں جانتے ہیں کہ کونسی کچی سبزی کتنی فائدہ مند ہے۔
موسمی سلاد:سلاد ،پیاز، ٹماٹر اور پودینہ کو کاٹ کر ان میں نمک اور سیاہ مرچ کا پاؤڈر شامل کریں اور اس پر لیموں کا رس ڈال لیں۔
کھیرا :کھیرا کے باریک باریک قتلے کاٹ لیں،اس میں ابلے ہوئے آلو،ٹماٹر، پودینہ شامل کرلیں اور نمک و مرچ سیاہ چھڑک کر اس میں لیموں کا رس حسب ذائقہ نچوڑ لیں۔ایسے لوازمات سے کھانا جلد ہضم ہو جاتا ہے۔
مولی:مولی کو کدو کش کر کے اس میں مولی کے پتے ، پیاز اور ٹماٹر شامل کر لیں۔نمک اور پسی ہوئی سیاہ مرچ ڈال کر کھائیں،بہت طاقتور اور ہاضم چیز ہے۔اگر کوئی شخص دو تین ماہ کچی سبزیوں کا استعمال کرے تو اس کے جسم میں غیر معمولی چستی اور طاقت رونما ہو جائے گی۔جسم کے زہریلے اور گندے مادے خارج ہو جائیں گے۔
لیموں کی چائے:اگر طبیعت بھاری ہو،متلاتی ہو تو صبح کے وقت ہلکی چائے بنا کر لیموں نچوڑ کر پئیں،بے حد فائدہ ہو گا۔
لیموں کا اچار:لیموں پچاس عدد لے لیں۔ایک کلو نمک ملا کر آٹھ دن تک دھوپ میں رکھیں۔اس کے بعد لیموں خشک کر کے مرتبان میں ڈال لیں اور اس میں دگنے لیموں کا عرق نچوڑ دیں۔ چار دن تک دھوپ میں رکھیں، صحت بخش لیموں کا اچار تیار ہے۔
سر کی خشکی کیلئے:سر میں خشکی ہو تو تل کے ایک پاؤ تیل میں چوتھائی حصہ لیموں کا عرق ملا کر چند دن تک بالوں کی جڑوں میں اچھی طرح لگائیں،خشکی دورہو جائے گی۔
پیاز:اس کی دو قسمیں ہوتی ہیں ایک جنگلی اور دوسری بستانی۔ ان دونوں میں بظاہر کوئی فرق نہیں لیکن بستانی پیاز کھانے اور ادویات میں مستعمل ہے۔ اس کا مزاج گرم و تر ہے۔ بعض کے نزدیک گرم و خشک بھی ہے۔ یہ مشہور و عام سبزی ہے، جس کے بغیر سالن نہیں پکایا جاتا۔ اس کو گوشت میں مصالحہ کی بجائے استعمال کیا جاتا ہے۔ برسات کے موسم میں اس کا استعمال موسمی بیماریوں کیلئے بڑا مفید ہے۔ غذا میں اس کے استعمال سے آنکھوں کی بیماریوں میں افاقہ ہوتا ہے۔ ہیضہ میں نافع ہے۔
لہسن(تھوم) :یہ تیسرے درجے میں گرم و خشک ہے،اس کا رنگ زردی مائل سفید اور ذائقہ تلخ و تیز ہوتا ہے۔ اس کے دو دن کے استعمال سے خون کا دباؤ کافی حد تک کم ہو جاتا ہے۔ یہ پولیو، آنتوں کے امراض ، جسمانی کیڑوں، امراض جلد، پھوڑے، دماغی امراض کیلئے بھی مفید ہے۔
بند گوبھی اور ہری مرچ:آپ ہری یا عنابی گوبھی، ہری مرچ کے ساتھ ملا کر کھاسکتے ہیں۔ گوبھی بہت سارے وٹامنز کا بہترین ذریعہ ہے اور قابل ہضم فائبر ز بھی فراہم کرتی ہے۔ ہری مرچ میں موجود وٹامن سی ، گوبھی سے حاصل ہونیوالے منرلز کو ہضم کرنے کے عمل میں تیزی لاتی ہے۔ اس کے علاوہ ہری مرچ پوٹاشیم اور دیگر وٹامنز فراہم کرے گی۔
ٹماٹر اور شملہ مرچ:رنگین شملہ مرچ قوت مدافعت بڑھانے والے وٹامنزسے بھرپور ہوتی ہے۔ اسے ایسیڈیٹی دور کرنے والے ٹماٹر کیساتھ ملا کر استعمال کیا جائے تویہ آپ کے جسم کیلئے بے پناہ فائد ہ مند ہوگی۔ انہیں سرکہ کے ساتھ بھی استعمال کیا جاسکتا ہے۔
گاجر اور مولی:دونوں سبزیوں کو باریک کاٹ لیں اور ان پر نمک اور لیموں چھڑک لیں۔ مولی کی ترشی کا مداوا گاجر کرے گی۔ اس امتزاج کے ساتھ آپ مولی کے پتے اور ایواکاڈو کے سلائس بھی استعمال کر سکتے ہیں۔ ایواکاڈو آپ کو اومیگا تھری فیٹی ایسڈ فراہم کرتاہے ، جو قدرتی غذائوں سے بمشکل حاصل ہوتا ہے۔ مولی کی ہاضمہ بہتر کرنے کی قابلیت آپ کے جسم میں گاجر ہضم کرنے کے عمل کو تیز اور بہتر کرتی ہے۔
