آج کا دن
اسپیشل فیچر
تاریخی گرمی کی لہر
25جولائی 2019ء کویورپ شدید گرمی کی ایک غیر معمولی لہر کی لپیٹ میں آ گیا۔ جس کے دوران 25 جولائی کو برطانیہ، بیلجیم، نیدرلینڈز اور جرمنی میں تاریخ کے بلند ترین درجہ حرارت ریکارڈ کیے گئے۔ کئی شہروں میں پارہ 40 ڈگری سینٹی گریڈ سے بھی تجاوز کر گیا، جس سے معمولات زندگی بری طرح متاثر ہوئے۔ اس شدید گرمی کے باعث صحت کے مسائل، جنگلات میں آگ لگنے کے واقعات اور نقل و حمل میں رکاوٹیں پیدا ہوئیں۔
کونکورڈ حادثہ
25جولائی 2000ء کو ایئر فرانس کی کانکورڈ پرواز 4590 پیرس کے شارل ڈی گال ہوائی اڈے سے اڑان بھرنے کے چند لمحوں بعد حادثے کا شکار ہو گئی۔ جس کے نتیجے میں جہاز میں سوار تمام 109 افراد اور زمین پر موجود 4 افراد سمیت 113 افراد جان کی بازی ہار گئے۔ تحقیقات کے مطابق رن وے پر موجود دھات کے ایک ٹکڑے سے ٹائر پھٹنے کے باعث حادثہ پیش آیا، جس کے بعد کانکورڈ طیاروں کی سروس بالآخر ختم کر دی گئی۔
افغان جنگی راز بے نقاب
25جولائی2010ء کو وکی لیکس نے افغانستان جنگ سے متعلق امریکی فوج کی خفیہ دستاویزات شائع کیں، جو امریکی فوجی تاریخ میں معلومات کے سب سے بڑے انکشافات میں شمار ہوتی ہیں۔ ان دستاویزات میں ہزاروں فوجی رپورٹس، جنگی کارروائیوں، عام شہریوں کی ہلاکتوں، طالبان کی سرگرمیوں اور سکیورٹی معاملات کی تفصیلات شامل تھیں۔ اس انکشاف نے دنیا بھر میں تہلکہ مچا دیا اور افغانستان جنگ، امریکی پالیسیوں اور سرکاری معلومات کی رازداری پر نئی بحث چھیڑ دی۔
خاتون خلانورد کا اعزاز
1984ء میں آج کے روز سوویت خلائی اسٹیشن ''سالیوت 7‘‘ (Salyut 7 ) پر موجود خلا نورد سویتلاناساویتسکایا خلا میں چہل قدمی کرنے والی دنیا کی پہلی خاتون بن گئیں۔ انہوں نے اپنے ساتھی خلانورد کے ساتھ خلائی اسٹیشن سے باہر تقریباً ساڑھے تین گھنٹے گزارے اور مختلف سائنسی و تکنیکی تجربات انجام دیے۔ ان کی یہ تاریخی کامیابی خلائی تحقیق میں خواتین کے کردار کا ایک اہم سنگ میل ثابت ہوئی اور اس نے مستقبل میں خواتین کی خلائی مہمات کیلئے نئی راہیں ہموار کیں۔
چین میں زلزلہ
25جولائی 1668ء کو مشرقی چین میں 8.5 شدت کا ایک تباہ کن زلزلہ آیا، جس نے وسیع علاقے کو شدید نقصان پہنچایا۔ اس قدرتی آفت کے نتیجے میں 43 ہزار سے زائد افراد ہلاک ہو گئے، جبکہ بے شمار لوگ زخمی اور لاکھوں بے گھر ہوئے۔ ہزاروں مکانات، سرکاری عمارتیں اور زرعی زمینیں تباہ ہو گئیں، جس سے خطے میں شدید انسانی اور معاشی بحران پیدا ہوا۔ یہ زلزلہ چین کی تاریخ کے مہلک ترین زلزلوں میں شمار کیا جاتا ہے۔
شام میں دھماکے
25جولائی 2018ء کو شام کے جنوبی صوبے اس السویدا میں مربوط دہشت گرد حملوں کا سلسلہ پیش آیا، جس میں خودکش دھماکے، فائرنگ اور مختلف دیہات پر حملے شامل تھے۔ ان حملوں کے نتیجے میں 250 سے زائد افراد جاں بحق اور سیکڑوں زخمی ہوئے، جن میں بڑی تعداد عام شہریوں کی تھی۔ یہ حملے شام کی خانہ جنگی کے دوران ہونے والے مہلک ترین واقعات میں شمار کیے جاتے ہیں۔
