10 نومبر:عالمی یوم سائنس برائے امن و ترقی
اسپیشل فیچر
خوشحالی اور پائیدار مستقبل کی ضمانت
سائنس انسانی تہذیب و تمدن کی ترقی، معاشرتی خوشحالی اور دنیا کو درپیش مسائل کے حل میں بنیادی کردار ادا کرتی ہے۔ آج کا جدید انسان زندگی کے جس سہولت بخش دور میں سانس لے رہا ہے اس کے پیچھے صدیوں کی سائنسی تحقیق، تجربات، مشاہدات اور انسانی ذہانت کارفرما ہے۔ طب، زراعت، صنعت، مواصلات، تعلیم، توانائی اور ٹیکنالوجی سمیت زندگی کا شاید ہی کوئی شعبہ ایسا ہو جو سائنس کے اثرات سے دور ہو۔ سائنس نے نہ صرف انسانی زندگی کو آسان بنایا ہے بلکہ اقوام کے درمیان ترقی، خوش حالی اور تعاون کے نئے امکانات بھی پیدا کیے ہیں۔ اسی اہمیت کے پیش نظر ہر سال 10 نومبر کو دنیا بھر میں عالمی یومِ سائنس برائے امن و ترقی (World Science Day for Peace and Development) منایا جاتا ہے۔اقوام متحدہ کے ادارے یونیسکو نے 2001ء میں اس دن کو منانے کا اعلان کیا تھا ۔ اس دن کو منانے کا بنیادی مقصد معاشرے میں سائنس کی اہمیت کو اجاگر کرنا، سائنسی شعور کو فروغ دینا، تحقیق کے لیے سازگار ماحول پیدا کرنا اور سائنس کو عالمی امن و ترقی کے مقاصد کے حصول کے لیے استعمال کرنا ہے۔
سائنس اور انسانی ترقی
انسانی تاریخ کا مطالعہ کیا جائے تو معلوم ہوتا ہے کہ ہر دور کی بڑی تبدیلیوں کے پیچھے سائنسی سوچ اور تحقیق کا بنیادی کردار رہا ہے۔ قدیم زمانے میں پہیے کی ایجاد سے لے کر جدید دور میں اے آئی، روبوٹکس، خلائی تحقیق اور جدید طبی ٹیکنالوجی تک، سائنس نے انسانی ترقی کے سفر کو نئی سمت دی ہے۔ آج انسان ہزاروں میل کا سفر چند گھنٹوں میں طے کر سکتا ہے، دنیا کے کسی بھی حصے میں موجود شخص سے لمحوں میں رابطہ کر سکتا ہے اور ایسی بیماریوں کا علاج ممکن بنا چکا ہے جو کبھی ناقابلِ علاج تصور کی جاتی تھیں۔ ویکسین، جدید سرجری، تشخیصی آلات اور ادویات نے لاکھوں انسانی جانیں بچائی ہیں۔ اسی طرح زرعی سائنس نے بہتر بیجوں، جدید آب پاشی، کھادوں اور زرعی مشینری کے ذریعے غذائی پیداوار میں اضافہ ممکن بنایا ہے۔ ان تمام شعبوں میں سائنس نے نہ صرف معاشی ترقی کے نئے راستے کھولے ہیں بلکہ روزگار کے مواقع پیدا کرنے اور معیارِ زندگی بہتر بنانے میں بھی اہم کردار ادا کیا ہے۔
عالمی امن اور سائنس
عالمی یومِ سائنس کا ایک اہم مقصد سائنس کو امن کے فروغ کا ذریعہ بنانا ہے۔ بظاہر سائنس اور امن دو مختلف موضوعات محسوس ہوتے ہیں لیکن حقیقت میں دونوں کا گہرا تعلق ہے۔ سائنسی ترقی انسانوں کے درمیان مشترکہ مسائل کے حل، باہمی تعاون اور اعتماد کی فضا پیدا کر سکتی ہے۔ موسمیاتی تبدیلی، وبائی امراض، پانی کی کمی، غذائی قلت اور قدرتی آفات جیسے مسائل کسی ایک ملک تک محدود نہیں۔ ان سے نمٹنے کے لیے عالمی سطح پر سائنسی تعاون اور مشترکہ حکمت عملی ناگزیر ہے۔ کورونا وبا کے دوران عالمی سطح پر سائنسی تحقیق، معلومات کے تبادلے اور ویکسین کی تیاری نے ثابت کیا کہ انسانی بقا کے بڑے چیلنجز کا مقابلہ مشترکہ کوششوں سے ہی ممکن ہے۔تاہم سائنس کا استعمال ہمیشہ انسانیت کی فلاح کے لیے نہیں ہوا۔ جنگی ٹیکنالوجی کی تباہ کن صلاحیت اس حقیقت کی یاد دہانی ہے کہ سائنسی ترقی کے ساتھ اخلاقی ذمہ داری بھی ضروری ہے۔
سائنسی تحقیق اور جدید تقاضے
ملک عزیزپاکستان کے لیے سائنس اور ٹیکنالوجی کی اہمیت دوچند ہے۔ ملک کو آبادی میں اضافے، توانائی کے بحران، موسمیاتی تبدیلی، پانی کی قلت، زرعی مسائل اور معاشی مشکلات جیسے متعدد چیلنجز کا سامنا ہے۔ ان مسائل کا مستقل اور مؤثر حل جدید سائنسی تحقیق، ٹیکنالوجی کے فروغ اور معیاری تعلیم کے بغیر ممکن نہیں۔
پاکستان ایک زرعی ملک ہے اس لیے زرعی تحقیق کے ذریعے ایسی فصلوں کی تیاری ضروری ہے جو کم پانی میں زیادہ پیداوار دیں اور موسمیاتی تبدیلیوں کا مقابلہ کر سکیں۔ نوجوان ملکی آبادی کا بڑا حصہ ہیں، جو مناسب تعلیم، تربیت اور مواقع ملنے پر سائنس، انفارمیشن ٹیکنالوجی اور مصنوعی ذہانت کے شعبوں میں نمایاں کردار ادا کر سکتے ہیں۔تاہم تحقیق کے لیے مطلوبہ وسائل کی کمی، تعلیمی اداروں میں عملی تجربات کے محدود مواقع اور تحقیق و صنعت کے درمیان کمزور روابط جیسے مسائل ہیں۔ ضرورت اس امر کی ہے کہ سائنسی تعلیم کو محض نصابی کتابوں تک محدود رکھنے کے بجائے طلبہ میں سوال کرنے، مشاہدہ کرنے، تجربات کرنے اور نئے خیالات پیش کرنے کی صلاحیت پیدا کی جائے۔
سائنس اور اخلاقی ذمہ داری
موجودہ دور میںاے آئی، جینیٹک ریسرچ، روبوٹکس اور ڈیجیٹل ٹیکنالوجی نے انسانی زندگی میں غیر معمولی تبدیلیاں پیدا کی ہیں۔ یہ ایجادات جہاں ترقی کے وسیع امکانات رکھتی ہیں، وہیں ان کے غلط استعمال سے کئی نئے خطرات بھی جنم لے سکتے ہیں۔ معلومات کی چوری، سائبر کرائم، جعلی خبریں، نجی زندگی میں مداخلت اور ٹیکنالوجی تک غیر مساوی رسائی ایسے مسائل ہیں جن پر سنجیدگی سے توجہ دینے کی ضرورت ہے۔اس لیے ضروری ہے کہ سائنسی ترقی کے ساتھ انسانی اقدار، اخلاقیات، انصاف اور سماجی ذمہ داری کو بھی اہمیت دی جائے۔ سائنس کا اصل مقصد صرف نئی ایجادات کرنا نہیں بلکہ ان ایجادات کے ذریعے انسانی زندگی کو بہتر، محفوظ اور باوقار بنانا ہے۔10 نومبر کا عالمی یومِ سائنس ہمیں یہ پیغام دیتا ہے کہ علم، تحقیق اور سائنسی شعور ہی بہتر دنیا کی بنیاد ہیں۔ حکومتوں، تعلیمی اداروں، سائنسدانوں، صنعتکاروں اور معاشرے کو مل کر سائنس کے فروغ کے لیے اپنا کردار ادا کرنا ہوگا۔ خصوصاً نوجوان نسل میں سائنسی سوچ، تخلیقی صلاحیت اور تحقیق کا شوق پیدا کرنا وقت کی اہم ضرورت ہے۔
