×

تفریح

نانا پاٹیکر کی موت کیسے ہوئی؟ پوسٹ مارٹم رپورٹ سامنے آگئی

بند کریں

ممبئی: (ویب ڈیسک) معروف بھارتی اداکار نانا پاٹیکر 75 برس کی عمر میں 8 اکتوبر کو گوا میں اپنی رہائش گاہ پر دل کا دورہ پڑنے سے انتقال کر گئے تھے، پوسٹ مارٹم رپورٹ کے مطابق ان کی موت دل کی شریان میں خون کا لوتھڑا پھنسنے کے باعث ہوئی۔

بھارتی خبر رساں ادارے پی ٹی آئی کے مطابق گوا میڈیکل کالج اینڈ ہسپتال کے ایک سینئر ڈاکٹر نے بتایا کہ خون کا لوتھڑا دل کو خون کی فراہمی میں رکاوٹ بنا، جس کے نتیجے میں اداکار کی موت واقع ہوئی۔

ڈاکٹروں کے مطابق نانا پاٹیکر کی طبیعت خراب ہونے پر ان کی دیکھ بھال کرنے والے شخص نے ایمبولینس طلب کی، طبی امداد کیلئے پہنچنے والے عملے اور ڈاکٹروں نے انہیں بچانے کی کوشش کی اور 45 منٹ تک سی پی آر دیا، تاہم وہ جانبر نہ ہو سکے، انہیں صبح 5 بج کر 10 منٹ پر مردہ قرار دیا گیا۔

اداکار کے بیٹے ملہار والد کی میت لینے گوا پہنچے، میت پہلے پونے لے جائی گئی، جس کے بعد اسے ڈونجے گاؤں میں واقع فارم ہاؤس منتقل کیا گیا، جہاں سرکاری اعزاز کے ساتھ آخری رسومات ادا کی گئیں۔

آخری رسومات میں مہاراشٹر کی نائب وزیراعلیٰ سنیترا پوار، مرکزی وزرا رام داس اٹھاولے اور مرلی دھر موہول، اداکار جیکی شروف سمیت بالی وڈ اور دیگر شعبوں سے تعلق رکھنے والی شخصیات نے شرکت کی۔

نانا پاٹیکر نے ہندی اور مراٹھی سنیما میں چار دہائیوں سے زائد عرصے تک کام کیا، وہ اداکار ہونے کے ساتھ مصنف اور ہدایت کار بھی تھے، فلمی دنیا اور فنون کے شعبے میں خدمات کے اعتراف میں انہیں 2013ء میں بھارت کے چوتھے بڑے شہری اعزاز پدم شری سے نوازا گیا تھا۔

انہوں نے 1978ء میں مظفر علی کی فلم ’گامن‘ سے ہندی فلموں میں قدم رکھا، جبکہ فلم ’پراہار: دی فائنل اٹیک‘ سے ہدایت کاری کا آغاز کیا، اس فلم میں انہوں نے ایک فوجی افسر کا کردار بھی ادا کیا۔

فراہم کردہ معلومات کے مطابق نانا پاٹیکر آخری بار 2026ء میں ریلیز ہونے والی فلم ’صوبیدار‘ میں مختصر کردار میں نظر آئے، جس میں انیل کپور اور رادھیکا مدن نے بھی اہم کردار ادا کیے۔