سندھ کے دو سیاسی بڑوں کا رابطہ، ملکی سیاسی صورتحال پر تبادلہ خیال
حیدرآباد: (دنیا نیوز) سندھ کے دو سیاسی بڑوں کا رابطہ ہوا، سروری جماعت کے روحانی پیشوا مخدوم جمیل الزمان اور حروں کے روحانی پیشوا پیر پگاڑا کے درمیان رابطہ ہوا۔
ذرائع کے مطابق دونوں روحانی گدی نشینوں کے سربراہوں نے بذریعہ ٹیلیفونک ایک دوسرے کی طبیعت معلوم کی، پیرپگاڑا اور مخدوم جمیل الزمان نے ملکی سیاسی صورتحال پر بھی تبادلہ خیال کیا، سندھ میں بڑھتی ہوئی بدامنی، لاقانونیت سمیت امن امان کی خراب صورتحال پر بات چیت کی۔
ذرائع نے مزید بتایا کہ دونوں گدی نشینوں نے سیاسی، معاشی، ترقیاتی طور پیچھے رہنے والے صوبہ سندھ کے معاملات پر گفتگو کی، سندھ کی بہتری، خوشحالی کے لئے دونوں گدی نشینوں نے مشاورت کی، آئندہ روز میں دونوں روحانی پیشواؤں کے درمیان ملاقات کا بھی امکان ہے۔
ذرائع کے مطابق جی ڈی اے کے سربراہ پیر پگاڑا اور رکن قومی اسمبلی مخدوم جمیل الزمان کے درمیان ملاقات سے قبل سندھ کے دیگر ساتھیوں سے رابطہ کرنے پر بھی اتفاق ہوا ہے۔
