کراچی: شہر کے 2 نادرا میگا سینٹرز میں پاسپورٹ دفاتر کے قیام کا فیصلہ
کراچی: (دنیا نیوز) شہر قائد میں عوام کو سہولت کی فراہمی کیلئے حکومت نے شہر کے 2 نادرا میگا سینٹرز میں پاسپورٹ دفاتر کے قیام کا فیصلہ کیا ہے۔
نادرا میگا سینٹر فائیو سٹارچورنگی اور نادرا میگا سینٹر سیمنس چورنگی(سائٹ) میں شہریوں کو پاسپورٹ کی سہولیات مہیا کی جائیں گی۔
حکومت کی جانب سے متبادل پاسپورٹ سینٹرز کے قیام کا فیصلہ مرکزی پاسپورٹ آفس پر رش کم کرنے کیلئے کیا گیا ہے۔
واضح رہے کہ گزشتہ دنوں ڈی جی پاسپورٹ مصطفیٰ جمال قاضی کے کراچی دورے کے موقع پر نادرا سینٹرمیں پاسپورٹ آفس کے قیام کا فیصلہ کیا گیا تھا۔
ذرائع کا کہنا ہے کہ کراچی سمیت ملک بھر کے 11 کے قریب نادرا میگا سینٹرز پر پاسپورٹ کی سہولیات متعارف کرائی جا رہی ہے۔
