نوشکی: بی ایل اے کا ایف سی قافلے پر حملہ، 3 جوان، 2 شہری شہید، تین دہشتگرد ہلاک
نوشکی: (دنیا نیوز) بلوچستان کے علاقے نوشکی میں کالعدم بی ایل اے کے ایف سی قافلے پر خودکش حملے میں 3 اہلکار اور 2 شہری شہید ہوگئے جبکہ جوابی کارروائی میں تین دہشت گرد جہنم واصل کر دیئے گئے۔
سکیورٹی ذرائع کے مطابق دہشت گردوں نے صبح سویرے بلوچستان کے علاقے نوشکی میں دالبندین روڈ پر ایف سی کے قافلے پر بارودی مواد کا دھماکا اور خود کش حملہ کیا، بزدلانہ خود کش حملے میں ایف سی کے 3 جوان اور 2 شہری شہید ہوگئے۔
ذرائع کا کہنا ہے کہ سکیورٹی فورسز نے حملہ آور دہشت گردوں کے خلاف فوری موثر جوابی کارروائی کی جس کے نتیجے میں خود کش حملہ آور کے علاوہ مزید 3 دہشت گرد جہنم واصل ہوئے۔
سکیورٹی ذرائع کے مطابق فورسز کا علاقے کو گھیرے میں لے کر کلیئرنس آپریشن جاری ہے، سکیورٹی فورسز نے دہشت گردوں کے بھاگنے والے تمام راستے بلاک کر دیئے ہیں، آخری دہشت گرد کے خاتمے تک کلیئرنس آپریشن جاری رہے گا۔
وزیراعظم کی مذمت
وزیراعظم شہباز شریف نےبلوچستان کے ضلع نوشکی میں بم دھماکے کی شدید مذمت کرتے ہوئےقیمتی جانوں کے نقصان پر اظہار افسوس کیا۔
شہباز شریف نے جاں بحق افراد کی بلند درجات کی دعا اور ان کے لواحقین سے اظہار تعزیت کیا، انہوں نے ہدایت کی کہ دھماکے میں زخمی ہونے والوں کو ہر ممکن طبی امداد فراہم کی جائے۔
وزیراعظم نے کہا کہ اس قسم کی بزدلانہ کارروائیاں دہشت گردی کے خلاف ہمارے عزم کو متزلزل نہیں کر سکتیں۔
معصوم لوگوں کو نشانہ بنانا سفاکیت کی انتہا ہے: محسن نقوی
وفاقی وزیر داخلہ محسن نقوی نے نوشکی دالبندین روڈ پر ہونے والے دھماکے کی مذمت کی اور جاں بحق افراد کے اہل خانہ سے دلی ہمدردی و اظہارِ تعزیت کیا جبکہ زخمیوں کی جلد صحتیابی کے لیے دعا بھی کی۔
محسن نقوی کا کہنا تھا کہ جاں بحق افراد کے خاندانوں کے غم میں برابر کے شریک ہیں، معصوم لوگوں کو نشانہ بنانا سفاکیت کی انتہا ہے۔
وزیر داخلہ نے مزید کہا کہ ملک دشمن وطن عزیز میں عدم استحکام پیدا کرنے کی گھناؤنی سازش کر رہا ہے، اس طرح کی بزدلانہ کارروائیوں کے ذریعے قوم کے پختہ عزم کو کمزور نہیں کیا جا سکتا۔
دہشتگردی کے ذریعے عوام کے حوصلے پست نہیں کئے جا سکتے: ترجمان بلوچستان حکومت
دوسری جانب ترجمان بلوچستان حکومت شاہد رند نے نوشکی دالبندین شاہراہ پر بس کے قریب دھماکے کی مذمت کی اور قیمتی جانوں کے ضیاع پر اظہار افسوس کیا، انہوں نے جاں بحق افراد کے اہل خانہ سے دلی ہمدردی اور تعزیت کا اظہار کیا۔
شاہد رند نے کہا کہ زخمیوں کی جلد صحتیابی کیلئے دعاگو ہیں، دکھ کی اس گھڑی میں متاثرہ خاندانوں کیساتھ کھڑے ہیں، بے گناہ افراد کو نشانہ بنانا انتہائی سفاکانہ عمل ہے۔
ترجمان بلوچستان حکومت کا کہنا تھا کہ دشمن عناصر ملک میں عدم استحکام پیدا کرنے کی مذموم کوششیں کر رہے ہیں، دہشت گردی کے ذریعے عوام کے حوصلے پست نہیں کئے جا سکتے۔
