خیبر پختونخوا حکومت کا ہوم سٹے سیاحت کے فروغ کیلئے میزبان پروگرام کا آغاز
پشاور: (دنیا نیوز) خیبر پختونخوا حکومت نے سیاحت کے فروغ، مقامی آبادی کو روزگار کی فراہمی اور معاشی خود کفالت کے لیے ہوم سٹے منصوبے کے تحت اہم اقدام اٹھاتے ہوئے میزبان پروگرام شروع کر دیا ہے، وزیر اعلیٰ خیبر پختونخوا نے اس پروگرام کے تحت بلاسود قرضوں کے چیک تقسیم کیے۔
وزیر اعلیٰ سہیل آفریدی نے کہا ہے کہ اس منصوبے کا بنیادی مقصد سیاحت کو فروغ دینا اور مقامی افراد کو باعزت روزگار کے مواقع فراہم کرنا ہے۔
بریفنگ میں بتایا گیا کہ میزبان پروگرام کے ذریعے سیاحتی علاقوں کے مقامی لوگوں کو 30 لاکھ روپے تک بلاسود قرضے فراہم کیے جا رہے ہیں جبکہ اب تک مجموعی طور پر 95 افراد میں چیک تقسیم کیے جا چکے ہیں۔
بریفنگ کے مطابق سوات، اپر چترال، لوئر چترال، اپر دیر، لوئر دیر، ایبٹ آباد اور مانسہرہ کے رہائشیوں کو اس پروگرام کے تحت قرضے فراہم کیے جا رہے ہیں، اس منصوبے کے ذریعے قومی اور بین الاقوامی سیاحوں کو نجی گھروں میں قیام کی معیاری سہولت میسر آئے گی اور سیاحوں کو اپنائیت کے ساتھ بہتر سہولیات فراہم کی جائیں گی۔
وزیر اعلیٰ کا کہنا تھا کہ ہم نے پیسے بھی کمانے ہیں اور عزت بھی دینی ہے اور عزت کمانی بھی ہے، پاکستان تحریک انصاف کی صوبائی حکومت محدود وسائل کے باوجود اپنے عوام پر سرمایہ کاری کر رہی ہے تاکہ ملک ترقی کی راہ پر گامزن ہو،2022 سے آج تک قوم مہنگائی کی چکی میں پس رہی ہے جبکہ وفاق کے ذمے خیبر پختونخوا کے 4000 ارب روپے سے زائد کے بقایاجات ادا نہیں کیے جا رہے۔
وزیر اعلیٰ نے الزام عائد کیا کہ آئی ایم ایف کی رپورٹ کے مطابق وفاقی حکومت میں 5300 ارب روپے کی کرپشن سامنے آئی ہے اور وفاق میں بیٹھے کرپٹ حکمران عوام کے پیسوں سے عیاشیاں کر رہے ہیں۔
سہیل آفریدی نے مزید کہا ہے کہ عوام پر سرمایہ کاری ہی ملک کی ترقی کی ضمانت ہے اور عوام کے مینڈیٹ پر ڈاکہ ڈالنے والوں کو سوچنا چاہیے کہ ملک کس سمت جا رہا ہے۔
