فیفا ورلڈ کپ 2026 کیلئے ریکارڈ انعامی رقم کا اعلان
نیویارک: (دنیا نیوز) فٹ بال کی عالمی تنظیم فیفا نے ورلڈ کپ 2026 کے لیے ریکارڈ توڑ انعامی رقم کا اعلان کر دیا۔
فیفا کے اعلامیے کے مطابق 2026 کے فٹ بال ورلڈ کپ میں مجموعی طور پر 65 کروڑ 50 لاکھ ڈالرز یعنی 18 بلین پاکستانی روپے کی انعامی رقم تقسیم کی جائے گی، اس سے قبل فیفا ورلڈ کپ 2022 میں مجموعی طور پر 44 کروڑ ڈالرز کی انعامی رقم تقسیم کی گئی تھی۔
اعلامیے کے مطابق فیفا ورلڈ کپ 2026 کی فاتح ٹیم کو 5 کروڑ ڈالرز کی انعامی رقم دی جائے گی، پچھلے ایڈیشن میں یہ رقم 4 کروڑ 20 لاکھ ڈالرز تھی۔
فیفا ورلڈ کپ 2026 کی رنر اپ ٹیم کو 3 کروڑ 30 لاکھ ڈالرز کی انعامی رقم دی جائے گی جبکہ تیسرے نمبر پر آنے والی ٹیم کو 2 کروڑ 90 لاکھ اور چوتھے نمبر کی ٹیم کو 2 کروڑ 70 لاکھ ڈالرز ملیں گے۔
اعلامیے کے مطابق 5 ویں سے 8 ویں پوزیشن کی ٹیموں کو ایک کروڑ 90 لاکھ ڈالرز ملیں گے جبکہ 9 ویں سے 16 ویں پوزیشن کی ٹیم کو ایک کروڑ 50 لاکھ ڈالرز کی انعامی رقم دی جائے گی۔
17 سے 32 ویں پوزیشن پر آنے والی ہر ٹیم کو ایک کروڑ 10لاکھ ڈالرز ملیں گے جبکہ 33 سے 48 ویں پوزیشن پر آنے والی ہر ٹیم کو فی ٹیم 90 لاکھ ڈالرز کی انعامی رقم ملے گی۔
فٹ بال ورلڈ کپ کے لیے کوالیفائی کرنے والی ہر ٹیم کو فیفا تیاریوں کے لیے اضافی 15 لاکھ ڈالرز بھی دے گا، فٹ بال ورلڈ کپ اگلے برس امریکا، کینیڈا اور میکسیکو میں ہو گا جس میں 48 ٹیمیں شرکت کریں گی۔
