کائلی جینر کا گھر میں پرُاسرار آوازیں آنے کا انکشاف، مداح پریشان
واشنگٹن: (ویب ڈیسک) امریکی میڈیا سٹار اور بزنس وومن کائلی جینر نے اپنے گھر سے متعلق ایک حیران کن انکشاف کرتے ہوئے مداحوں کو چونکا دیا ہے۔
غیر ملکی میڈیا رپورٹس کے مطابق مشہور ریئلٹی شو دی کارڈیشینز کے سیزن 7 کی تازہ قسط میں کائلی جینر نے دعویٰ کیا کہ ان کے گھر میں مافوق الفطرت اثرات محسوس ہوتے ہیں اور وہاں عجیب و غریب آوازیں سنائی دیتی ہیں۔
شو کے دوران گفتگو کرتے ہوئے کائلی نے اپنی والدہ کرس جینر اور اسکاٹ ڈسک کو بتایا کہ انہیں واقعی اپنے گھر کے معاملے پر مدد کی ضرورت ہے، کائلی کے مطابق ابتدا میں دیواروں سے زور زور کی آوازیں آنا شروع ہوئیں جیسے کوئی چیز ٹکرا رہی ہو یا گر رہی ہو۔
کرس جینر نے سوال کیا کہ آیا یہ آوازیں برتنوں یا دروازے پر دستک جیسی ہیں جبکہ سکاٹ ڈسک نے خدشہ ظاہر کیا کہ شاید پائپ لائن میں خرابی ہو تاہم کائلی نے ان تمام قیاس آرائیوں کو مسترد کرتے ہوئے کہا کہ آوازیں بالکل ایسی محسوس ہوتی ہیں جیسے کوئی شخص گر پڑا ہو اور یہ کسی ترتیب کے بغیر آتی ہیں۔
کائلی جینر، جنہوں نے 2016 میں کیلیفورنیا کے علاقے ہڈن ہلز میں 12 ملین ڈالر کا شاندار گھر خریدا تھا، کا کہنا تھا کہ بعض راتوں میں مسلسل آوازیں آتی ہیں جبکہ بعض راتیں بالکل خاموش گزرتی ہیں، وہ اکثر نیند سے اس آواز پر جاگ جاتی ہیں کہ جیسے باتھ روم یا الماری میں کوئی چیز گر گئی ہو۔
اسی قسط میں کائلی نے انکشاف کیا کہ ان کی بہن کینڈل جینر بھی ان آوازوں سے اس قدر خوفزدہ ہوئیں کہ آدھی رات کو ہی گھر چھوڑ کر چلی گئیں، کینڈل جینر نے بھی اس بات کی تصدیق کرتے ہوئے کہا کہ کائلی کا گھر سو فیصد آسیب زدہ محسوس ہوتا ہے اور وہاں داخل ہوتے ہی سرد سی لہر اور کسی کی موجودگی کا احساس ہونے لگتا ہے۔
