اسلام آباد 2025 میں عالمی سطح کے پر امن شہروں کی فہرست میں شامل
اسلام آباد:(دنیا نیوز) اسلام آباد 2025 میں عالمی سطح کے پر امن شہروں کی فہرست میں شامل ہوگیا۔
عالمی جریدے نے اسلام آباد کو صفحہ اوّل کے پرامن شہروں میں شامل کیا، جرائم میں مجموعی طور پر سال 2025 میں سال 2024 کے مقابلے میں 37 فیصدکمی واقع ہوئی، سنگین جرائم میں سال 2024 کے مقابلے میں 69 فیصد نمایاں کمی ہوئی۔
غیر ملکی جریدے نےاپنی رپورٹ میں لکھا کہ رواں سال اسلام آباد پولیس نے 20 سے زائد ہائی پرو فائل کیسز کو 24 گھنٹے سے بھی کم وقت میں ٹریس کئے،23683 ملزمان کو گرفتار کرکے 2 ارب روپے سے زائد کا مال مسروقہ برآمد کیا گیا۔
اِسی طرح ڈکیتی،راہزنی ،کار اور موٹر سائیکل چوری میں ملوث 578 گینگز کے 1308 ارکان گرفتار کیے، گرفتار گینگز سے کروڑوں روپے مالیت کی 375 گاڑیاں اور 851 موٹر سائیکل برآمد ہوئیں۔
عالمی جریدے کا کہنا تھا کہ سال 2025 میں قتل کے مقدمات میں اسلام آباد پولیس کی موثر کارروائیاں، 187 ملزمان گرفتار4000 سے زائد اشتہاری اور سابقہ ریکارڈ یافتہ مجرمان کی گرفتاری عمل میں لائی گئی، قبضہ مافیا کے خلاف 157 مقدمات کا اندراج کر کے 161 ملزمان گرفتار کیے گئے۔
اسلحہ سے پاک اسلام آباد مہم کے تحت غیر قانونی اسلحہ اور اسلحہ کی نمائش کے خلاف بھر بور کاروائیاں عمل میں لائی گئیں ، ہوائی فائرنگ میں ملوث 200 سے زائد ملزمان،غیر قانونی اسلحہ رکھنے میں ملوث 2308 ملزمان گرفتار کیے، ملزمان سے 304 رائفلیں، 92 بندوقیں، 2200 سے زائد پستول 294 خنجر اور 37491 روند برآمد کیے گئے۔
منشیات کے خلاف خصوصی مہم نشہ اب نہیں کے تحت 1801 منشیات فروش گرفتار، تعلیمی اداروں کو منشیات فراہم کرنے میں ملوث 29 ملزمان کو جیل بھجوایا گیا،منشیات فروشوں کے قبضہ سے 323 کلو گرام چرس، 550 کلو گرام ہیروئن،161 کلو گرام آئس برآمد ہوئی جس میں 10 کلو گرام افیون ، نشہ آور گولیاں اور 8427 بوتل شراب برآمد کی گئیں۔
عالمی جریدے کا کہنا تھا کہ بہترین تفتیش کی بدولت اسلام آباد پولیس نے سال 2025 میں عدالتوں سے قتل کے مقدمات میں 14 ملزمان کو سزائے موت جبکہ 14 ملزمان کو عمر قید کی سزائیں دلوائیں اور شہریوں کے مسائلِ کے فوری حل کے لیے 1270 سے زائد کھلی کچہریوں کا انعقاد کیا ، کھلی کچہریو ں سے ایک لاکھ سے زائد شہری مستفید ہوئے۔
رپورٹ میں بتایا گیا کہ رواں سال میں 3973 پیشہ ور بھکاریوں کو گرفتار کیا گیا، جرائم کے انسداد اور امن و عامہ کے قیام کے حوالے سے 465 سے زائد سرچ آپریشن کئے گئے ، پولیس نے 2337 لاء اینڈ آرڈرز کے دوران شہریوں کو بھرپور سکیورٹی اور سہولیات فراہم کیں۔
عالمی جریدے نے مزید لکھا کہ سال 2025 میں شہریوں کی جان و مال کی حفاظت کی خاطر اسلام آباد پولیس کے4 افسران شہید اور 33 افسران غازی قرار پائے، سال 2025 میں پولیس ریسپانس یونٹ اور سٹی واچر سکواڈ کا قیام عمل میں لایا گیا۔
