یو اے ای سے پاکستانیوں نے 696 ملین ڈالر وطن بھیج کر ریکارڈ بنا دیا
شارجہ: (سید مدثر خوشنود) سٹیٹ بینک آف پاکستان کے جاری کردہ اعداد و شمار کے مطابق فروری 2026 کے دوران متحدہ عرب امارات میں مقیم پاکستانیوں نے تقریباً 696 ملین ڈالر ترسیلاتِ زر پاکستان بھیج کر دنیا بھر میں پہلی پوزیشن حاصل کی۔
ماہرین کے مطابق یہ پیش رفت ملکی معیشت کے استحکام اور زرمبادلہ کے ذخائر میں بہتری کے لیے اہم قرار دی جا رہی ہے۔
اسی کامیابی کے موقع پر شارجہ میں ایک خصوصی تقریب کا اہتمام کیا گیا جس میں پاکستان کے قونصل جنرل حسین محمد، پاکستان سوشل سنٹر شارجہ کے صدر خالد حسین چوہدری، سفارتی عملے کے ارکان اور بزنس و کمیونٹی شخصیات کی بڑی تعداد نے شرکت کی، تقریب کے دوران پاکستانی برادری کی خدمات کو سراہتے ہوئے کیک بھی کاٹا گیا اور ترسیلاتِ زر میں مسلسل کردار پر خراجِ تحسین پیش کیا گیا۔
مقررین نے اپنے خطاب میں کہا کہ متحدہ عرب امارات میں مقیم پاکستانی نہ صرف کاروباری اور پیشہ ورانہ میدان میں نمایاں کردار ادا کر رہے ہیں بلکہ ترسیلاتِ زر کے ذریعے وطن کی معاشی ترقی میں بھی بھرپور حصہ ڈال رہے ہیں، انہوں نے اس عزم کا اظہار کیا کہ اوورسیز پاکستانی مستقبل میں بھی اسی جذبے کے ساتھ ملکی معیشت کو مضبوط بنانے میں اپنا کردار جاری رکھیں گے۔
تقریب کے شرکا کے مطابق ترسیلاتِ زر میں اضافہ پاکستان اور متحدہ عرب امارات کے درمیان مضبوط معاشی روابط کی عکاسی کرتا ہے جبکہ کمیونٹی کے باہمی تعاون اور یکجہتی کو مزید فروغ دینے کی ضرورت پر بھی زور دیا گیا۔
