اکشے کمار کی ممبئی میں آنکھوں کی سرجری، کام سے وقفہ لینے کا فیصلہ
ممبئی : (ویب ڈیسک) بالی ووڈ کے سینئر اداکار اکشے کمار کی بدھ کی صبح ممبئی میں آنکھوں کی ایک مائنر سرجری کی گئی، سرجری کے باعث انھوں نے کچھ دنوں کا وقفہ لینے کا فیصلہ کیا ہے۔
اس سے قبل انھوں نے اپنی آئندہ آنیوالی فلم کی شوٹنگ مکمل کروائی تھی۔
واضح رہے کہ اکشے کمار کے لیے 2026 اب تک کافی مصروف رہا ہے، پریا درشن کی فلم بھوت بنگلہ میں کامیابی حاصل کرنے کے بعد انہوں نے ہدایتکار انیس بزمی کے ساتھ اپنی اگلی فلم کی شوٹنگ شروع کر دی تھی، تاہم اپنے مصروف شیڈول کے بعد انہوں نے اب اس سرجری کے لیے وقت نکالا ہے۔
غیر ملکی میڈیا کے ذرائع کے حوالے سے بتایا کہ یہ ایک معمولی سرجری تھی جو بدھ کی صبح انجام دی گئی جو نظر کی درستگی کے لیے تھی۔
اکشے اب کچھ دن آرام کریں گے اور صحت یابی کے بعد کام شروع کریں گے، انہوں نے اس سے قبل انیس بزمی کے ساتھ اپنی اگلی فلم کا کیرالا شیڈول بھی مکمل کیا جس میں انکے ساتھ ودیا بالن اور رشی کھنہ بھی شامل ہیں۔
جہاں تک کام کا تعلق ہے تو 58 سالہ اکشے کمار جو انڈسٹری کے مصروف ترین اداکاروں میں شمار ہوتے ہیں، کے پاس اس وقت کئی فلمیں موجود ہیں جن میں ویلکم ٹو دی جنگل، حیوان، گول مال 5 اور مراٹھی فلم ویڈات مراٹھے ویر دوڑلے سات شامل ہیں۔
