×

دنیا

متحدہ عرب امارات میں 4 روز تک بارش کا امکان، تیز ہواؤں کی پیش گوئی

بند کریں

دبئی: (سید مدثر خوشنود) متحدہ عرب امارات میں جمعہ 30 اکتوبر سے پیر 2 نومبر تک شمالی اور مشرقی علاقوں میں مختلف اوقات کے دوران بارش کا امکان ظاہر کیا گیا ہے۔

قومی مرکز برائے موسمیات کی تازہ پیش گوئی کے مطابق ملک کے بعض حصوں میں بادل چھائے رہیں گے جبکہ تیز ہواؤں اور گردوغبار کے باعث حدِ نگاہ بھی متاثر ہوسکتی ہے۔

موسمی پیش گوئی کے مطابق جمعہ کو پہاڑی علاقوں میں ہواؤں کی رفتار 55 کلومیٹر فی گھنٹہ جبکہ اندرونی علاقوں میں 45 کلومیٹر فی گھنٹہ تک پہنچ سکتی ہے۔

تیز ہواؤں کے باعث کھلے مقامات اور شاہراہوں پر گردوغبار اڑنے کا امکان ہے، جس سے گاڑی چلانے والوں کو مشکلات پیش آسکتی ہیں، دوسری جانب اندرونی علاقوں میں زیادہ سے زیادہ درجہ حرارت 38 ڈگری سینٹی گریڈ تک پہنچنے کی توقع ہے۔

قومی مرکز برائے موسمیات سے منسوب پیش گوئی کے مطابق ہفتہ، اتوار اور پیر کو بھی شمالی اور مشرقی علاقوں کے بعض مقامات پر بارش کے امکانات برقرار رہیں گے، تاہم اس پیشگوئی کا مطلب یہ نہیں کہ متحدہ عرب امارات کی تمام 7 ریاستوں میں مسلسل 4 روز بارش ہوگی، بارش کی شدت اور دورانیہ مختلف علاقوں میں مختلف ہو سکتا ہے۔

موسمی صورتحال کے پیش نظر شمالی اور مشرقی امارات کا سفر کرنے والے شہریوں، رہائشیوں اور سیاحوں کے لیے تازہ موسمی معلومات سے باخبر رہنا اہم ہوگا، بالخصوص پہاڑی راستوں اور کھلی شاہراہوں پر سفر کے دوران تیز ہواؤں، گردوغبار اور ممکنہ حدِ نگاہ میں کمی کو مدنظر رکھنے کی ضرورت ہے۔

گلف نیوز کی 30 اکتوبر کی رپورٹ کے مطابق آئندہ 4 روز کے دوران موسم میں تبدیلی کے امکانات موجود ہیں، تاہم کسی مخصوص علاقے میں شدید بارش یا سیلاب کی تصدیق شدہ پیش گوئی سامنے نہیں آئی۔