ٹریفک پولیس اہلکار کو مارنے اور خوف پھیلانے کا کیس: ملزم کی درخواست ضمانت خارج
اسلام آباد: (دنیا نیوز) آئی ایٹ مرکز میں ٹریفک پولیس اہلکار کو مارنے اور خوف و ہراس پھیلانے کے کیس میں برطانوی نژاد پاکستانی شہری ملزم عاقب خان کی بعدازگرفتاری درخواست ضمانت خارج کر دی گئی۔
انسداد دہشت گردی عدالت کے جج ابوالحسنات ذوالقرنین نے ملزم کی درخواست ضمانت پر سماعت کی۔
وکیل ملزم عاقب کا کہنا تھا کہ میرا موکل برطانوی شہری ہے اس کو پاکستانی قوانین کا علم نہیں تھا، یہ دہشت گردی کا کیس ہی نہیں بنتا پولیس نے جھوٹ پر مبنی مقدمہ درج کیا۔
پراسیکیوٹر راجہ نوید نے کہا کہ غیر ملکیوں کو پاکستانی قوانین کی زیادہ پاسداری کرنی چاہیے، ملزم سے اسلحہ برآمد ہوا جس سے ثابت ہوتا ہے اس نے ٹریفک اہلکار کو جان سے مارنا تھا، کمرشل ایریا میں ملزم نے خوف و ہراس پھیلایا، جس کی ویڈیو ثبوت موجود ہے، مختلف عدالتی نظیریں موجود ہیں پبلک مقامات پر خوف و ہراس پھیلانا دہشت گردی بنتی ہے۔
عدالت نے دلائل سننے کے بعد ملزم عاقب خان کی درخواست ضمانت خارج کر دی۔
یاد رہے کہ ملزم کے خلاف تھانہ آئی نائن میں دہشت گردی سمیت دیگر دفعات کے تحت مقدمہ درج ہے۔
