بلدیاتی قوانین اور اختیار پر قبضہ قبول نہیں: حافظ نعیم الرحمان
راولپنڈی :(دنیا نیوز) امیرجماعت اسلامی حافظ نعیم الرحمان نے کہا ہے کہ بلدیاتی قوانین پر اور بلدیاتی اختیار پر قبضہ قبول نہیں کریں گے ۔
جڑواں شہروں کے لیاقت باغ میں دھرنے کے شرکا سے خطاب کرتے ہوئے حافظ نعیم الرحمان کا کہنا تھا کہ بارش کے باوجود دھرنا کرنے پر خراج تحسین پیش کرتا ہوں، گزشتہ سال 14 دن کا دھرنا تھا کیا اب بھی آپ تیار ہیں۔
اُنہوں نے کہا کہ یہ فارم 47 کی پیدوار قوتیں ہیں، انہیں اسٹیبلشمنٹ نے حکومت میں بٹھا دیا، نواز شریف سمیت سب ہار گئے، اگر یہ چیمپئن ہیں تو اصل فارم لیکر آ جائیں، اسمبلی میں بیٹھے سارے لوگ جیتے نہیں مسلط کیا گیا۔
امیر جماعت اسلامی کا کہنا تھا کہ ہم نے آئین کے لئے طویل جدو جہد کرنی ہے، بلدیاتی ایکٹ کالا قانون ہے ، پنجاب حکومت کے دیگر قوانین اور ادارے بھی بنائے گئے ہیں ،یہ مقامی حکومتوں کے انتخابات نہیں کراتے، چھ سال سے بلدیاتی انتخابات نہیں کروائے گئے۔
حافظ نعیم الرحمان نے کہا کہ مسلم لیگ ن اور تحریک انصاف نے بلدیاتی انتخابات نہیں کروائے، بلدیاتی قوانین پر اور بلدیاتی اختیار پر جو قبضہ کیا گیا وہ ہم نہیں مانتے، میں وزیراعلیٰ ہاؤس لاہور کے گھیراؤ کی کال دوں تو آپ تیار ہیں۔
اُن کا مزید کہنا تھا کہ کیا آپ پنجاب اسمبلی کے گھیراؤ کے لئے تیار ہیں، نئے قوانین ہارس ٹریڈنگ کے لئے بنائے گئے۔
