پنجاب میں دھند کا راج، مختلف مقامات پر موٹروے ٹریفک کیلئے بند
لاہور: (دنیا نیوز) پنجاب میں دھند کا راج، مختلف مقامات پر موٹروے ٹریفک کیلئے بند کر دیا گیا۔
ترجمان موٹروے پولیس سید عمران احمد کے مطابق لاہور سیالکوٹ موٹروے ایم 11 کو دھند کی وجہ سے بند کر دیا گیا، موٹروے ایم 2 لاہور سے کوٹ مومن تک موٹروے ایم 4 پنڈی بھٹیاں سے فیصل آباد تک ٹریفک کیلئے بند ہے۔
سید عمران احمد کا کہنا ہے کہ موٹرویز کی بندش کا مقصد عوام کے جان و مال کا تحفظ ہے، غیر ضروری سفر سے اجتناب کریں۔
ترجمان سنٹرل ریجن نے کہا کہ ، دھند میں لین کی خلاف ورزی خطرناک حادثات کا باعث ہو سکتی ہے، روڈ یوزرز لین ڈسپلن پر سختی سے عمل کریں۔
انہوں نے کہا کہ شہری دن کے اوقات میں سفر کو ترجیح دیں، دھند میں صبح 10 تا شام 6 بجے تک محفوظ سفری اوقات ہیں۔
سید عمران احمد نے کہا کہ ڈرائیور حضرات فوگ لائٹس لازمی استعمال کریں، تیز رفتاری نہ کریں، آگے والی گاڑی سے محفوظ فاصلہ رکھیں، رہنمائی اور مدد کے لیے ہیلپ لائن 130 پر رابطہ کریں۔
