×

پاکستان

جسٹس مسرت ہلالی کی ریٹائرمنٹ پر سپریم کورٹ میں فل کورٹ ریفرنس

بند کریں

اسلام آباد: (دنیا نیوز) سپریم کورٹ آف پاکستان میں جسٹس مسرت ہلالی کی ریٹائرمنٹ کے موقع پر فل کورٹ ریفرنس منعقد ہوا، جس میں سپریم کورٹ کے ججز، ایڈیشنل اٹارنی جنرل، بار نمائندگان، سینئر وکلاء، عدالتی افسران اور دیگر معزز مہمانوں نے شرکت کی۔

مقررین نے جسٹس مسرت ہلالی کی پیشہ ورانہ دیانت، عدالتی بصیرت اور انصاف کی فراہمی سے غیر متزلزل وابستگی کو سراہتے ہوئے کہا کہ انہوں نے اصول پسندی، آزادی اور ممتاز خدمات کے ذریعے بنچ اور بار میں عزت و احترام حاصل کیا۔

چیف جسٹس آف پاکستان نے جسٹس مسرت ہلالی کی ممتاز عدالتی خدمات کو شاندار خراجِ تحسین پیش کرتے ہوئے کہا کہ ان کا عدالتی سفر جرات، ثابت قدمی اور انصاف سے غیر متزلزل وابستگی کا مظہر ہے۔

چیف جسٹس نے کہا کہ جسٹس مسرت ہلالی کا کیریئر اعلیٰ عدالتی مقام حاصل کرنے کے ساتھ رکاوٹیں عبور کرنے اور قابلِ تقلید مثال قائم کرنے کے حوالے سے بھی نمایاں رہا۔

انہوں نے بالخصوص قانونی پیشے میں قیادت کی خواہشمند خواتین کے لیے ایک دیرپا مثال قائم کی۔

چیف جسٹس کے مطابق جسٹس مسرت ہلالی کا کیریئر پاکستان کے شعبۂ انصاف میں خواتین کی بڑھتی ہوئی شرکت اور قیادت کی روشن مثال ہے، دیانت، لگن اور پیشہ ورانہ مہارت عدالتی قیادت کی حقیقی پہچان ہیں۔

چیف جسٹس نے عدالتی ذمہ داری، ادارہ جاتی دیانت اور عوامی خدمت کے فروغ میں جسٹس مسرت ہلالی کی خدمات کو سراہتے ہوئے سپریم کورٹ کے ججز، افسران، عملے اور عدالتی برادری کی جانب سے ان کی قومی خدمات پر گہری قدر دانی کا اظہار کیا۔

چیف جسٹس آف پاکستان نے جسٹس مسرت ہلالی کے لیے اچھی صحت، کامیابی اور آئندہ زندگی کے لیے نیک خواہشات کا اظہار بھی کیا۔