فلسطینی بھکاری کے گھر سے لگژری گاڑیاں اور بھاری رقم برآمد
رام اللہ: (دنیا نیوز) فلسطینی بھکاری کروڑ پتی نکلا، پولیس نے چھاپے کے دوران گھر سے 5 لگژری گاڑیاں اور بھاری رقم برآمد کرلی۔
عرب میڈیا کی رپورٹ کے مطابق فلسطینی پولیس نے مغربی کنارے پر واقع شہر رام اللہ کے شمالی قصبے بیر زیت میں ایک بھکاری کے گھر پر چھاپہ مار کر انتہائی لگژری گاڑیاں اور 15,000 شیکل کی بھاری رقم برآمد کی ہے، جس کے بعد مذکورہ بھکاری کو گرفتار کرلیا گیا ہے۔
سوشل میڈیا پر پولیس کی جانب سے چھاپے کے بعد برآمد اشیاء کی تصاویر گردش کر رہی ہیں، جس میں بھکاری اور اس کے بھائی کی ملکیت لگژری کاروں کا ذخیرہ دیکھا جاسکتا ہے۔
فلسطینی پولیس نے چھاپے اور گرفتاری کی تفصیلات بتاتے ہوئے کہا کہ افسران کو صوبے کے باہر سے آنے والے ایک شخص پر شک ہوا جو مشکوک حالات میں بر زیت میں گشت کے دوران گاڑی میں بیٹھا دکھائی دیا تھا۔
پولیس کے مطابق حراست میں لیا گیا فرد مبینہ طور پر چوراہوں اور سڑکوں پر بھیک مانگنے میں مصروف تھا اور مبینہ طور پر اس نے دیگر لوگوں کو بھی رام اللہ کے مختلف عوامی مقامات اور چوراہے پر بھیک مانگنے کے لیے کام پر رکھا ہوا تھا۔
پبلک پراسیکیوشن کی جانب سے سرچ وارنٹ کے اجراء کے بعد، مشتبہ شخص کی رہائش گاہ کی تلاشی لی گئی، اس دوران اس کے پاس پانچ لگژری گاڑیوں کا انکشاف ہوا جو مبینہ طور پر اس اور اس کے بھائی کی تھیں، دونوں اشخاص کو بعد میں گرفتار کر لیا گیا۔
