خوبصورت دیواریں ۔۔۔گھر کی رونق بڑھائیں
جس طرح گھر کیلئے دیواریں ضروری ہیں اسی طرح دیواروں کیلئے سجاوٹ بھی بہت ضروری ہے۔ خوبصورت دیواریں گھر کی خوبصورتی کو دوبالا کر دیتی ہیں۔
جب بھی گھر کی خوبصورتی کو بڑھانے کی بات آتی ہے تو یہی ذہن میں آتا ہے کہ گھر میں رنگ و روغن کروا لیا جائے۔اکثر یہی سمجھا جاتا ہے کہ رنگ کروانے سے دیواروں میں جان سی آجاتی ہے لیکن یہ سوچ غلط ہے،اکثر رنگ کروانے کے باوجود دیواریں پھیکی اور بے جان سی ہی لگتی ہیں۔ویسے تو اب دیواروں کو خوبصورت بنانے کیلئے پیلنگ اور وال پیپر سمیت بیشمار اشیاء مارکیٹ میں دستیاب ہیں مگر یہ سب مہنگے کام ہیں۔ اگر آپ کے پاس ان چیزوں کو خریدنے کیلئے پیسے نہیں ہیں تو آپ گھر بیٹھے مختلف طریقوں سے گھر کی پھیکی اور بے رونق دیواروں میں جان ڈال سکتی ہیں۔ وہ طریقے کیا ہیں، آئیے جانیے۔
دیواریں اگر سادہ ہیں تو اچھا سا کیلنڈرلٹکا کر ان میں ایک نئی جان ڈالی جا سکتی ہے۔خوبصورت تصاویریا پینٹنگ والے کیلنڈر کا انتخاب کریں۔ ایسے پرانے کیلنڈرز جو بہت اچھے منظر یا پینٹنگز پر مشتمل ہوں انہیں کاٹ کر فریم کروا کردیواروں پر لگا لئے جائیں تو ان کی رونق بڑھ جاتی ہے۔
جوٹ،مکرامے یا دھاگے سے مختلف دیواروں پر لٹکانے والے وال آرٹ آپ خود گھر میں تیار کر سکتی ہیں۔ انٹرنیٹ پر مختلف ڈوریوں کی مدد سے گھر پر ہی گھڑی تیار کرنا،مکرامے تیار کرنے کی ویڈیوز موجود ہیں۔ان کا سائز بڑا رکھا جائے اور گھر پر اپنے ہاتھوں سے تیار کردہ ان شاہکاروں کو ڈرائنگ روم یا بیڈ روم میں لگائیں اور ان کمروں کی دیواروں میں جان ڈالیں۔ ہمارے گھروں میں مختلف جرائد،رسالے اور اخبارات روزانہ آتے ہیں،جو پڑھنے کے بعد بیکار پڑے رہ جاتے ہیں اور بعد میں انہیں ردی کر کے فروخت کر دیا جاتا ہے جبکہ یہی رسالے اور اخبارات آپ کے بہت کام آسکتے ہیں۔ان میں سے اپنی پسندیدہ ڈشز یا شخصیات کی تصاویر، پینٹنگز اور مناظر کو کاٹ کر انہیں کسی گتے پر چپکا لیں،پھر اسے فریم کرکے گھر کی دیواروں پر لگا لیں۔
عائشہ اکرم نے اسلامیات میں ایم فل کر رکھا ہے اور وہ ایک فری لانس لکھاری ہیں
