چہرے کی فالتو چکنائی کا مسئلہ پریشان ہونا چھوڑئیے
جس طرح خشکی جلد کیلئے مضر ہے اسی طرح چہرے کی زائد چکنائی بھی جلد کیلئے نقصان دہ ہے۔ اگر آپ کی جلد چکنی ہے اور اس پر موجودہ دانوں کیل مہاسوں کے باعث آپ میک اپ نہیں کرپاتیں اور شاید اسی لئے آپ تقریبات میں کم کم شرکت کرتی ہیں تو یہ اس مسئلے کا حل نہیں ۔
میک اپ کرنا اور خود کو سنوارنا آپ کا بنیادی حق ہے اور چہرے کی فالتو چکنائی سے جان چھڑانا آپ کے بس میں ہے۔روزانہ صبح آئینے میں جب آپ اپنا دیدار کرتی ہیں تو سب سے پہلے آپ کی توجہ چہرے پر موجود اس چکنائی پر مرکوز ہو جاتی ہے جس سے آپ پریشان رہتی ہیں ۔ صرف یہی نہیں یہ تیل آپ کے چہرے کو اکثر و پیشتر دانوں کیل مہاسوں کی آماجگاہ بھی بنائے رکھتا ہے۔ بیشتر خواتین جو اس مسئلے کا شکار ہیں یعنی جن کی جلد چکنی ہے وہ بازار سے مختلف کیمیکلز سے بھر پور مہنگی لیکن غیر مؤثر دوائیں ، کریم ، لوشن کا استعمال کرتی ہیں مگر نتائج بے سود ہوتے ہیں۔
پانی زیادہ پئیں
روزانہ علی الصبح ایک گلاس پانی نہار منہ پئیں اور اگر اس میں چند قطرے لیموں کے اور ایک چائے کا چمچ شہد بھی شامل کر لیں تو اس سے نہ صرف آپ کی جلد کی رنگت نکھر جائے گی بلکہ آپ اپنے چہرے پر نئے نکلنے والے مہاسوں سے نجات حاصل کر لیں گی۔ طبی نقطہ نگاہ سے یوں بھی ایک نارمل انسان کو آٹھ تا دس گلاس پانی ضرور پینا چاہئیں۔
کھیرے کا استعمال اور جلد
چہرے کی فالتو چکنائی ختم کرنے کیلئے کھیرے کا رس بہترین چیز ہے۔ ایک عدد کھیرے کا جوس نکالیں اور اس میں چند قطرے ٹھنڈے پانی کے شامل کر لیں اور اس سے پورے چہرے کی لیپائی کریں۔ اپنی جلد کو اسی حالت میں تقریباًایک گھنٹے تک رکھیں بعد میں ٹھنڈے پانی سے دھو لیں۔ اس طرح آپ کا چہرہ فریش ہو جائے گا۔
عرق گلاب کا استعمال
موسم گرما میں چہرے کو بازاری کیمیکلز سے صاف کرنے کی بجائے خالص قدرتی عرق گلاب کا استعمال کریں اور تازہ عرق گلاب اپنے فریج میں رکھیں۔ اگر عرق گلاب کے ساتھ بیسن کا آمیزہ تیار کر لیں اور اس میں ایک چمچ دہی بھی شامل کر لیں اور پھر اسے پورے چہرے پر لگائیں اور تھوڑی دیر تک یونہی لگا رہنے دیں بعد میں چہرے کو ٹھنڈے پانی سے دھو لیں۔ اس طرح نہ صرف آپ کے چہرے کو تازگی ملے گی بلکہ فالتو چکنائی بھی صاف ہو جائے گی۔ یہ ہیں وہ چند سادہ ہدایات، جن پر عمل کر کے خواتین گھر بیٹھے اپنی جلد کی زائد فالتو چکنائی سے نجات حاصل کر لیں گی، لیکن اس کے ساتھ ساتھ آپ کو اپنی خوراک پر بھی خصوصی توجہ دینی ہو گی۔ اگر آپ کی جلد چکنائی کا شکار ہے تو آپ کو اپنی خوراک میں سبزیاں، دالیں زیادہ سے زیادہ استعمال کرنی چاہئیں۔ البتہ گوشت بالخصوص سرخ گوشت کے استعمال سے چہرے پر مہاسے اور داغ نمودار ہونے لگتے ہیں لہٰذا ایسی خوراک سے بھی پرہیز کرنا ہو گی۔ اگر آپ ہر وقت ٹینشن، تفکر اور فرسٹریشن کو خود پر طاری رکھتی ہیں تو اس سے جلد از جلد نجات حاصل کر لیں، تازہ خوراک کھائیں اور خوش رہیں تاکہ آپ کی صحت آپ کے چہرے پر بھی بشاشت اور تازگی لائے۔
