KALEسپرفوڈ کیوں کہلاتی ہے؟
پاکستان میں بند گوبھی کی یہ قسم ہر جگہ دستیاب نہیں ہے جو ذائقے میں ترش بھی ہے اور کسی قدر کڑواہٹ بھی لئے ہوئے ہے۔ گہرے سبز پتوں کی باریک باریک جھریوں بھری شکل کی یہ سبزی دنیا بھر میں صحت کے اعتبار سے ’’سپر فوڈ‘‘ کہی جاتی ہے۔
یہ مخصوص گوبھی آپ کو اپنے سبزی والے سے نہیں ملے گی لہٰذا اپنے شہر کی کسی بڑی سپر مارکیٹ میں جایئے کیونکہ بروکلی ہو یا Kale یہ سبزیاں عام طور پر گلی کوچوں میں پکنے کیلئے نہیں آتی۔ عام لوگوں کو اس سبزی کے طبی خواص کا علم بھی نہیں ہے، اس لئے وہ اسے پاکستانی سبزی نہیں سمجھتے۔
فولادی قوت کا سرچشمہ
بند گوبھی، بروکلی، پھول گوبھی اور یہ تمام ایک ہی خاندان کی سبزیاں ہیں چنانچہ ان کے طبی خواص میں بھی حد درجہ مماثلت پائی جاتی ہے۔
Kaleمیں سرخ گوشت کی نسبت زیادہ آئرن اور اسی طرح کیلشیئم کی مقدار بھی پائی جاتی ہے۔ تاہم بنیادی طور پر یہ سبزی ’’وٹامن کے‘‘ پر مشتمل ہے۔ ’’وٹامن کے‘‘ انسانی جسم میں فاسد مادوں کا ذخیرہ نہیں ہونے دیتا۔ یہ مختلف سرطانوں کے خلاف بھرپور مزاحمت کرتا ہے چنانچہ Kale کھانے والوں کی شریانوں میں خون رواں دواں رہتا ہے۔ علاوہ ازیں اس میں کینسر پیدا کرنے والے عناصر کو بڑھنے سے روکنے کی صلاحیت پائی جاتی ہے۔ اس میں موجود کیلشیئم کی وجہ سے ہڈیوں کے امراض پر قابو پایا جا سکتا ہے۔ یہ سبزی جوڑوں کے درد، گھٹنے اور ٹخنے سوجنے کی بیماری میں افاقہ دیتی ہے۔
Kaleوٹامن اے اور سی سے بھرپور
یہ بلڈپریشر کو نارمل رکھنے میں مدد دیتی ہے۔ کولیسٹرول کی سطح میں کمی اور اسے ہموار سطح پر رکھتی ہے۔ وٹامن اے کی مدد سے استعمال کرنے والوں کو بصارت سے متعلق عارضوں میں آرام ملتا ہے۔ یہ وٹامن ہماری جلد کے کولا جن کی سطح بہتر رکھتا ہے۔ کولا جن ایسی پروٹین ہے جو عضلات اور پٹھوں میں پائی جاتی ہے لیکن بڑھتی ہوئی عمر کے ساتھ یہ اپنی نمی کھونے لگتی ہے۔ وٹامن سی کے ساتھ مل کر یہ قوت مدافعت کو بہتر کرتی ہے۔ یعنی Kaleمیں ان دونوں وٹامنز کی وجہ سے ہمارے مدافعتی نظام کو تحریک ملتی ہے۔
پاور فل اینٹی آکسیڈنٹس
اس سبزی میں اومیگا 3فیٹی ایسڈز ہماری جلد، بالوں اور ناخنوں کے لئے کارآمد ہیں۔ اس کے علاوہ آرتھرائٹس کے علاوہ مختلف اینٹی بایوٹیکس کے مضر اثرات دور کرنے اور مختلف اقسام کے کینسرز سے بچائو کیلئے Kale کھانا بے حد مفید ہے۔
Kale خوش ذائقہ نہیں،کیسے کھائی جائے؟
عام طور پر یہ سوال اٹھتا ہے کہ اس سبزی کو کیسے استعمال کیا جائے۔ اگر آپ اسے سادہ انداز میں نہیں کھا سکتے تو سیب اور لیموں کے جوس، تربوز کے شربت کے ساتھ ادرک کا عرق ملا کر اس سبزی کو Blendکیا جا سکتا ہے۔ اس طرح یہ مشروب ذائقے اور غذائیت دونوں میں بہتر رہے گا۔
اگر آپ Kaleکو بھاپ میں پکالیں۔ اس پر ہلکا سا نمک، ایک چائے کے چمچ کے برابر زیتون کا تیل چھڑک کر سلاد بنائی جا سکتی ہے یعنی اس ایک سبزی کے ساتھ مختلف شکلوں میں کئی چیزیں تیار کی جا سکتی ہیں۔ جن کے طبی و غذائی خواص بھی برقرار رہیں اور غذائیت پر کسی قسم کا سمجھوتہ بھی نہ ہو۔ تجرباتی بنیادوں پر کچھ بھی بنائیں اسے صحت بخش انداز میں استعمال کریں۔
