مگر مچھ کے بارے میں دلچسپ معلومات
مگر مچھ سے مراد ایسے رینگنے والے جانور ہیں جو زیادہ تر پانی کے اندر اور پانی سے باہر کم رہتے ہیں۔انہیں ہم ’’ جل تھلیے‘‘بھی کہتے ہیں۔اس خاندان میں مگر مچھ اور گھڑیال بھی شامل ہیں۔ مگرمچھ اپنا زیادہ تر وقت پانی میں گزارتے ہیں لیکن خشکی پر بھی زندہ رہ سکتے ہیں۔
مگر مچھ زیادہ تر افریقہ،ایشیا ،امریکہ اور آسٹریلیا میں پائے جاتے ہیں۔ان کی اکثریت میٹھے پانی جیسا کہ دریا، جھیل، دلدلوں جبکہ کچھ اقسام کھارے پانی میں بھی رہتی ہیں۔ان کی خوراک میں مچھلیاں اور ممالیہ جانور شامل ہیں،تاہم دیگر آبی جانور مثلاً گھونگے وغیرہ کھانے میں بھی کوئی عار محسوس نہیں کرتے۔
مگر مچھ بہت قدیم جانور ہے اور انداز ہ کیا جاتا ہے کہ ان میں ڈائنو سارس کے دور سے اب تک بہت کم تبدیلیاں آئی ہیں۔ڈائنو سارس ساڑھے چھ کروڑ سال قبل نا پید ہو گئے تھے جبکہ مگر مچھ تقریباً بیس کروڑ سال سے موجو دہیں۔
مگر مچھ کے دما غ کے گرد موجود جھلی،دل کے چار خانے اور ڈایا فرام کی موجودگی انہیں دوسرے آبی جانوروں سے الگ بناتی ہے۔ان کی بیرونی ساخت انہیں آبی اور شکاری جانور ظاہر کرتی ہے۔ ان کا جسم ایک خط کی شکل میں ہوتا ہے جس کی وجہ سے یہ تیزی سے تیر سکتے ہیں۔مگر مچھ تیرنے کے دوران پیر اپنے جسم سے چپکا لیتے ہیں جس سے تیرنا آسان ہو جاتا ہے۔ ان کے پیروں کی انگلیوں میں جھلی ہوتی ہے جس سے تیراکی میں مدد ملتی ہے۔اسی جھلی کی مدد سے یہ تیزی سے مڑ سکتے ہیں اور اچانک حرکت کرنا بھی ان کیلئے آسان ہو جاتا ہے۔اس کے علاوہ کم گہرے پانی میں دیگر جانوروں کی نسبت انہیں چلنے میں آسانی رہتی ہے۔
