ذرا مسکرایئے
ایک دفعہ ایک چو ہیا اپنے بچوں کے ساتھ جا رہی تھی کہ راستے میں ایک بلی آگئی۔ چوہیا نے فوراً زور سے کتے کی طرح بھونکنا شروع کر دیا۔
بلی فوراً بھاگ گئی۔
یہ دیکھ کر چوہیا نے اپنے بچوں کو نصیحت کی: دیکھا بچو دنیا میں مادری زبان کے علاوہ دوسری زبان کتنی ضروری ہے۔
٭٭٭
مالک نے نوکر کو ایک خط دے کر کہا:خط پر چار روپے کا ٹکٹ لگا کر لیٹر بکس میں ڈال دینا۔
نوکر ذرا بے وقوف تھا اس نے ٹکٹ نہ لگائے اور لیٹر بکس میں ڈال آیا۔
مالک نے پوچھا:کیوں بھئی! خط پر ٹکٹ لگا دیے تھے نا؟۔
نوکر نے خوشی سے جواب دیا: نہیں جناب! میں نے آپ کے پیسے بچا لیے‘ ڈاکیے سے نظر بچا کر خط کو لیٹر بکس میں ڈال دیا۔
٭٭٭
دنیا بھر کے سائنسدان ایک ایسا کمپیوٹر بنا رہے تھے جو کہ ہر سوال کا جواب دے سکتا تھا۔ بالآخر وہ اپنی کوششوں میں کامیاب ہو گئے۔
ٹیم کے سربراہ نے پہلا سوال کیا : یہ دنیا کیسے بنی؟۔
جواب ملا:گنینربک آف ورلڈ ریکارڈ دیکھیں۔
٭٭٭
استاد (شاگرد سے): تمہارا تعلق کس خاندان سے ہے؟
شاگرد: جناب! میرا تعلق جانوروں کے خاندان سے ہے۔
استاد: (حیرت سے) وہ کیسے؟
شاگرد: جناب! وہ اس طرح کہ ابو مجھے الو کہتے ہیں تو امی گدھا کہتی ہیں جبکہ دادا جان کہتے ہیں کہ میرا بیٹا شیر ہے شیر۔
٭٭٭
ایک بچے کے دادا کا انتقال ہو گیا۔ پڑوس کی دو خواتین تعزیت کیلئے آئیں۔ ایک بولی:70کے ہوں گے،دوسری بولی نہیں 60 کے ہوں گے۔
پاس ہی بچہ بیٹھا تھا وہ بولاـ:چلیں آنٹی! آپ 40ہی دے دیں۔
