جاپانی کہاوتوں میں محنت کرنے کا سبق
ہر ملک میں الگ الگ کہاوتیں مشہور ہیں جو وہاں کے رہن سہن کی عکاسی کرتی ہیں۔ جدوجہد کرنے اورعلم حاصل کرنے کی تلقین کرنے والی جاپانی کہاوتیں دنیا بھر میں مشہور ہیں۔
انہیں پڑھ کر جاپانی بچوں نے زندگی میں خوب محنت کرنا سیکھاہے۔ ہم آج ان میں سے چند کہاوتوں کے بارے میں بتاتے ہیں۔
کہاوت: ’’ ایک ہزار میل کا سفر ایک قدم سے شروع ہوتا ہے‘‘۔ اس میں جاپانی کہتے ہیں کہ خوب سوچ سمجھ کر فیصلہ کیجئے اور جب کوئی فیصلہ کر لیں تو اس پر ڈٹ جائیں۔ پھر سوچنا چھوڑ دیں۔
کہاوت ’’اپنی پوری کوشش کرو اور باقی کو تقدیر پر چھوڑ دو‘‘۔ بہت سے لوگ سمجھتے ہیں کہ شاید ہم لوگ سب سے زیادہ محنتی ہیں لیکن ایسا نہیں ہے۔وہ کہتے ہیں کہ انسان کو نتائج سے بے فکر ہو کر دیانت داری سے محنت کرنی چاہیے۔اسی طرح آپ کو بھی سکول اور کالج میں پوری محنت کرنے کے بعدنتائج اللہ پر چھوڑ دینا چاہیے۔بے شک وہی سب سے اچھا فیصلہ کرنے والا ہے۔
کہاوت ’’دوسروں کے ساتھ مہربانی کرو‘‘۔ ہمارے دین کی طرح جاپانی باشندے بھی دوسروں سے محبت اور بھلائی کا سبق دیتے ہیں، ان کی بہت سے رسومات میں دوسروں کیلئے احترام اور ان کے تحفظ کی تلقین کی گئی ہے۔ یہ کہاوت بھی جاپانی بچوں کو ہی نہیں بلکہ بڑوں کو بھی ایک دوسرے کے ساتھ بھلائی کرنے اور محبت سے پیش آنے کا درس دیتی ہے۔
کہاوت’’ خوش قسمت شخص ہنستا ہوا گھر میں آئے گا‘‘۔ کتنی اچھی بات انہوں نے ہمیں بھئی سکھائی ہے ۔وہ کہتے ہیں کہ خوش رہنے والا اچھی قسمت بنا سکتا ہے۔ ہنسی خوشی سے جینے والوں کی قسمت بھی اچھی ہوتی ہے۔
کہاوت’’ اگر آپ سوال کریں گے تو ایک منٹ کیلئے شرم محسوس ہوگی ، اگر سوال نہیں کریں گے تو زندگی بھر شرمندگی محسوس ہو گی۔ اس کہاوت میں یہ سبق ہے کہ بہت سے بچے سکول میں سوال کرنے سے گھبراتے ہیں کہ دوسرے بچے تعلیم میں کمزور سمجھیں گے۔ لیکن جاپانی کہتے ہیں کہ سوال کیجئے ورنہ تعلیمی کمزوری سے آپ پیچھے رہ جائیں گے ا ور زندگی بھر پچھتانا پڑے گا۔
